張晨：點解講「盡做」？因為真係做唔到囉

「盡做。」

我諗香港打工仔都好明白呢一句說話。甚至乎係大家對上司嘅口頭禪。

但點解我哋成日都要講「盡做」？因為真係太多嘢，根本做唔到。

喺香港打工仔嘅口中，「盡做」唔代表「盡力做到」，更多只係「盡力試下做到幾多」。

或者我哋個社會都習慣咗強人所難。

夜晚同你講聽日要份report、10萬Budget就要100萬嘅成果、明明6日嘅工作量要你3日完成。

每一樣都係燃燒你嘅生命；每一樣都毫無具說服力嘅原理。

似乎好多人都仲係信奉「啲奴工就係要逼㗎啦！逼就有；一唔逼就Hea。」

啱嘅，但啱唔晒。
適當嘅推動力係需要，不過唔係一嘢逼佢埋牆角囉。

有朋友做前線員工，咁每間鋪都有所謂target要追。而有時要追嗰個「數」係好唔合理，即係平時一日都係做萬零蚊生意，突然有日話要追5萬。

收到呢啲指令，一間鋪嘅supervisor會點做？同公司據理力爭？

唔會。只會向下屬「據數力捽」！

捽！捽！捽死佢！

所以見到客都要跟實，人哋買一樣就要sell佢買多樣，甚至出埋店鋪去搵客入嚟。總之「盡做」。

好，停一停先，咁仲算係「返工」咩？你似個畀人控制住嘅機械人一樣喎。

好多時，唔該一班上層人士下命令時，諗下究竟件事make唔make sense先啦。做到唔通唔做畀你咩？

有好多嘢，例如「10萬Budget就要100萬嘅成果」，
我哋身為你下面嗰個，根本唔可以順口長河話「一定得！」

你估咁有自信真係得人賞識咩，結果做唔到咪會瘀。

我哋只可以憑經驗同對行業嘅認識去增加個成功率。我覺得你請得佢就要信佢，用人不疑呀嘛！

之但係當件事嘅成功率係「接近零」嘅時候，點解我哋唔直接拒絕你呢？

因為我哋明白你唔會理亦唔會接受。於是我哋講「盡做」。

拖一時，等一下。希望有奇蹟，希望你會終有一日知道，自己嘅要求係幾咁天方夜譚。

原文刊於張晨（鳥不起）facebook，獲作者授權轉載。