曾智華：價值觀不應背棄主流

若果我肥碌並非出身香港電台，深知此機構文化，必會懷疑個新節目《我係乜乜乜》乃由幕後精心策劃，與陳百祥扯貓尾，搞到天怒人怨純為博宣傳，以爭取收聽率。

阿叻與小弟算是師兄弟（中學時，佢在聖若瑟書院就讀，高我兩班，可惜因行為問題被請離校），兼且，算是朋友。事實，我曾經極喜歡睇阿叻。尤其佢擔正《歡樂今宵》時期，形象積極鮮明，搞笑功力遠高於同期藝員，非常搶眼，故可突圍而出，其搏殺精神更受稱頌。

所以，雖則牙擦擦死要認叻，但仍受廣大巿民愛戴，能以諧星身份上紅館開演唱會爆棚，可謂創造奇迹，真真正正「叻，我至叻！」

後來，更犀利，轉行做練馬師，日日凌晨三點爬起床坐船過澳門操馬，毅力驚人。結果，再次能人所不能，一個外行人，竟可成為澳門頂級練馬師，贏個不亦樂乎，簡直為一個奮鬥模範，可以巡迴學校演講。

不過 …… 唔知幾時開始，阿叻形象開始起變化，由人人愛戴，變有人揶揄，再由有人揶揄，變為真真正正抗拒，甚至有點討厭。

究竟，發生咗乜事呢？阿叻自己知唔知，佢死黨譚詠麟、曾志偉，以至愛人黃杏秀又知唔知呢？當然，陳百祥一貫性格，就是 couldn't care less，話之你班友點睇我，睬你都傻。

人人有說話及行動自由，得嘅。不過，若繼續參與娛樂圈，主持電視節目，做公眾人物，就需要大多數人接受、支持，咁，價值觀就不應背棄主流。今天，阿叻已幾乎受全港年輕人摒棄，我肥碌有點心痛，因曾經係佢粉絲！

全文刊於《經濟日報》（收費閲讀），標題經TOPick 編輯修改，原題為「阿叻變變變」。