百萬Blogger：投資最錯是估頂摸底

近期終於見到樓市有明顯調整，你有咩感覺呢？後悔買得太早定無趁高價賣出？慶幸還未入市？對那些剛剛上車的人幸災樂禍？無論你是哪類人，我覺得這都是一個非常好的反思機會。

忠言從來逆耳，當樓市升得如火如荼時，叫你要小心注意風險的人（如湯文亮博士），你會覺得佢阻你發達；叫你踏實去計劃（如劉鳴煒先生），你會話佢離地。反而那些可能近年買咗樓，搭了順風車扮專家或只懂數據的分析員，講樓市長升長有，搬出失業率、空置率、落成量、建築成本和甚麼願景等資料數據，你就大聲叫好，留名學嘢，依家那些馬後炮的分析員又會有咩睇法呢？

以戰養戰要計數

從來投資就無必賺的，亦沒有數據能預測實際的境況，世界每天在變，明天的事無人能知曉，所以靠估去投資，風險就要自己負責啦！不過估市其實唔難，機會只有二分一，不是升就是跌，估中就個個當佢樓神，有時真係幾好笑！

還有那些未買過樓投資，又或者只買過幾間物業就扮專家的人，但仍有大把人信喎！如果你都信佢，咁依家應該引證一下他們早前的預測。如果未經歷過1997年金融風暴、2003年沙士、2008年金融海嘯，我相信你對風險管理都應該未夠火喉，你估次次都好似金融海嘯咁好彩，咁快復元咩？

所以入市要記住自己是投資而非投機，樓價升跌任何人都只靠估，賺價可以是好彩，但投資就唔同，一定要睇租金回報，就如有人說的「以戰養戰」，當然唔好用錯戰，計錯數啦！好似依家開始，未來嘅供款只會愈來愈高，租金可能會愈來愈低，係咪真係可以養戰真係要計清楚，唔好人講你又講呀！

估頂摸底者最錯

今次跌市究竟會維持幾耐呢？之前話等跌的你又有無諗住幾時先入市呢？若跌兩成又兩成，你又想佢跌多兩成，跌兩成升一成，你又後悔遲了，都係再等跌多兩成。日復日，年復年，所以點解你話我生得逢時，但點解又唔係個個都把握到機會？其實投資最錯就是估頂摸底，除非你係神！

雖然我上面講咗咁多廢話，但其實我無鼓勵大家入市。如果呢個真係跌市的開始，應該未算最低，因為試想依家最想賣樓會係咩人？但在「辣招」下有啲人依家想賣都唔賣得，即係想死都唔俾佢死。

不過到佢哋可以死，可能已經係兩年後，經濟又可能好返唔使死喎！咁到時佢哋又可能多謝政府啲「辣招」，唔係佢哋已經死咗！通常今年上車嘅人，好多都係諗咗幾年唔敢入，但係被「迷暈黨」講得多，講到好似樓市根本無可能跌，最後上咗車！呢班人依家可能好痛苦，但其實如果一開始清楚自己買樓目的，有計過數，其實唔應該會有煩惱，投資是好個人的事，千其唔好咁容易被人影響呀！

（節錄）

全文刊於《iMoney智富雜誌》第430期（收費閲讀），標題經TOPick編輯修改，原題為「樓市調整的反思」。

iMoney智富雜誌facebook