寒冬「放火」不傷露宿者尊嚴8個妙法

天氣嚴寒，坊間有熱心市民自發向露宿者、拾荒者等有需要人士，分享禦寒性衣物，但如何才能做到分享但不會傷害到對方的尊嚴？

平等分享行動發起人Benson Tsang分享了「放火」（分享物品給有需要人士）的8個技巧，新手人士不妨參考下：

1. 「火柴」包括超市現金券（$50為佳，面額細，方便使用）、餅咭、麥當勞現金券（可以用信用卡分換領）。

2. 見到街上的拾荒老人家，可上前搭訕，做法並不困難，問：「婆婆/伯伯，你知唔知邊度有惠X？」老人家就會教你點去，這就證明老人家店舖所在，就可以進行分享。

這一個步驟十分重要，因為若老人家不認識店子就不要分享，以免造成他們的負累。

3. 拿出「火柴」，開始「講大話」。例如，抽奬抽返嚟、朋友送俾你、你用唔晒等等，然後「求」他們麻煩幫你用左佢。

記着係佢幫你，唔係你幫佢。

4A. 超市現金券，因為好多老人家唔知購物券係乜，必需要教如何使用。你可告訴他們呢度係$50/$100，可以去超市當錢用，用來買米買油買乜都得。

老人家對和油有情意結，立刻會有反應。

4B. 餅咭-美X餅咭最為方便，告訴老人家地鐵站買麵包嗰間，舊式餅卡（可換一打西餅），真的餅卡面值＄50。

記住，千祈唔好同老人家講換西餅，因為會食壞佢哋，話俾佢哋聽可以換麵包，叫職員協助便可以。

5. 如使用超市券，特別提醒佢哋佢無錢找，問吓老人家數口叻唔叻，買咗$52補兩蚊就得，但係如果買咗＄48，蝕比超級市場就唔抵。

老人家蚊蚊都係錢，你一講「蝕」，佢就一定又會有反應。

6. 最後一個重點，千祈千祈千祈唔好同佢講「到期日」，因為婆仔性格，你話俾佢哋聽2017年到期，好可能到2018年仲喺度，一定要「恐嚇」佢盡快用（尤其話呢兩日要用），如果唔係就會「嘥」，一講「嘥」，老人家一定有第三次反應。

但係有啲老人家好醒，話俾你聽購物件上面「到期日」，你就要出絕招，話俾佢聽及市場成日加價，愈遲用愈買少野，會「好唔抵」！你一講「唔抵」，老人家就會比第四個反應你，唔會懶叻話「轉頭走去用」！

**以下呢個係絕招中的極絕招，「一定要」告訴他們超級市場「今個星期」大減價，「今個星期」一定要去，如果唔係「下個禮拜」回覆正價，買嘅嘢就會「少咗好多」！「好唔抵」！總之大話唔怕講，好人家就一定會聽話。

因為過去真係有老人家唔捨得用擺低咗，最後過咗期報廢了。
 

7. 物資只是橋樑，可以買樽水、一個麵包、一個飯盒、一個生果、一小包米，所以溝通才是重點，問甚麼也可以，有冇俾人呃砰、紙皮幾多錢斤、一天可以賺到幾多錢、去邊度食飯，唯獨是唔可以問「家庭狀況」，因為可能會令他們觸景傷情。

8. 最後，可以盡量抽下老人家水，摸下佢哋隻手（凍就叫佢着得件衫、暖就叫佢比d溫暖你），拍下佢膊頭，老人家會好開心嘅。

放火就係咁簡單，記着，分享是對等的，並沒有「施與受」，只是同「街坊」的身分探望另一些「街坊」。

還有一件事，「平等分享」是包括「選擇權」和「拒絕權」，既然唔係「施捨」，分享是「食檸檬」是理所當然的事情，完全不用介意，臨走之前祝福老人家：「身體健康，龍馬精神」，我估佢都唔會鬧你嘅！

真·香港人！共勉！施比受更有福！