樓市愈跌上車愈頭痕？

「點呀，諗住幾時買樓？」前日去飲撞番班舊同學，以為咁耐無見可以聚下舊，點知話題都離唔開買樓。

昔日班長阿Wing成為是晚焦點，皆因佢係新一輪「白居二」嘅幸運兒。如果Denise早啲知道，都會替佢開心，但家陣我就戥佢頭痕多啲。正如佢自己都話：

我未諗定買唔買，依家樓價跌緊，居屋價同私樓差唔多，無理由咁傻仲走去買未補地價居屋。

最近居屋價格跌得好急，新界區譬如屯門、馬鞍山減價盤湧現，新聞話減價幅度比半年前低兩至三成。聽阿Wing講，佢一年前開始就留意屯門幾個居屋盤，包括最近以170萬成交嘅兆麟苑（401呎，呎價4,240蚊）。翻查地產代理資料，4,240蚊呢個價，大約係兩年幾前嘅水平。

阿Wing透露，舊年曾經諗過，若然抽中白居二，個盤又跌穿200萬，就會入市。殊不知樓價一跌就跌去170萬，比預期更平，反令佢唔敢輕舉妄動。

「咁你Target幾時入市？」阿Wing答唔到。席間有位過來人提醒阿Wing：

綠表居屋放盤唔多，大部分係自住盤，你唔好期望居屋價會大跌，班業主根本唔憂亦唔急賣，樓價跌咪hold住層樓先囉。一年之限唔係好耐（編按：白居二中籤者須於一年內入市），你仲猶豫不決，蝕底係你自己。

全人類都期望跌市上車，卻甚少為部署入市時機。如今跌勢已成，你有咩Plan？

文章刊於《晴報》，標題經TOPick編輯修改，原題為「今期抽中白居二好頭痕」

《晴報》facebook