100毛給王維基的啓示：有幾多個老細敢做？
發布時間： 2016/02/03 17:43
最後更新： 2016/02/03 17:45
王維基早前出席毛記電視分獎典禮，坐足全程3小時，大讚好睇之餘，從中偷師是常識吧。「魔童」遇上「火星人」林日曦，正好給他日後再開台的重要啟示：
夠膽量、做自己、創意缺一不可。
他還看到一點，不要跟新一代講權威，或改變自己遷就市場，走自己獨有的路綫已足夠。盡管電視夢曾「被破滅」，但他堅持：
我仍然唔會放棄電視內容製作！
iMoney：全城熱話的100毛分獎典禮，當晚你坐足全程。
王維基：咁好睇，唔會走啦，點會走呀！應該無人走呀，點會咁傻呀！
iMoney：對媒體人來說，當晚亦好大啟示好震撼，沒想過新媒體年代，大家卻一齊返屋企或在外面搵大電視去睇這個騷。
王維基：還有一樣令我好震撼而他們又做得好好的，便是當晚我一坐低，佢哋已影我相放上Facebook，連我個女在英國也問：「乜你係度睇呀？」覆蓋已去到英國。然後有幾萬個View，他們玩呢樣嘢已到出神入化。
100毛有嘅DNA同我哋有嘅DNA係唔同，係兩個DNA來的，根本唔同種，佢哋係火星人，我哋係傳統地球人。
係咪好難做？好大製作？主持人好有經驗？好大Show咩？統統唔係，但成件事係好唔同的諗法。所以我梗係睇晒學嘢啦！好多嘢學！你睇阿曦（林日曦）成晚木無表情企喺度，我坐喺度其實望住佢多過望舞台，佢好叻，真係好叻！
有Guts玩不一樣的Package
iMoney：從中學了甚麼？
王維基：有啲嘢係學唔到，因為你無這個膽量，他們的女藝員（主播），同傳統電視女藝員係唔同Package。
你睇馬明（馬國明），我高度去到佢膊頭，但Dickson、盤菜瑩子，講高度講Package，佢哋完全唔係玩呢個遊戲，係玩另一個遊戲，
你要有咁嘅Guts，好多人夠做緊多媒體啦，但有幾多個老細敢做，同有咁嘅Guts？
iMoney：分獎禮另一熱門話題是，會否繼續有商界贊助常戲謔政治時事的100毛。如有機會，你會否贊助？
王維基：點會唔贊助呀？Shell實會（繼續）啦。如果林日曦話Shell唔贊助，咪我來囉，哈哈哈！
我都後悔啦，唔去贊助，否則講咁多次多謝HKTV Mall，走寶啦！
iMoney：你日後的電視台會走100毛這種路綫嗎？
王維基：當晚我坐喺度3個小時，你話我好欣賞啲歌詞同個Show嗎？唔覺得好特別，歌詞有時有啲夾硬，歌詞都係揶揄呀。
我當時深思的是，當我開台再做番節目時，有冇咁嘅Guts去放手俾一批仔？
唔係個個都好似佢哋咁叻嘛！網上有好多呢啲製作人，有幾多個100毛呢？恕我一竹篙打好多人，有幾多人會好似佢哋咁將件事成形、有創意，跟住仲搵到錢喎，係絕無僅有。
做歡樂今宵定做鄭多燕？
iMoney：你仍追求電視夢嗎？將軍澳電視製作中心的進展如何？
王維基：我哋仍在做移動電視牌照，制式仍在跟政府商討中，但我認為無理由一年內搞唔到，我預計三五個月可以搞掂！（塊地）年底起好啦，明年年初遷入去，將軍澳多媒體製作中心會用作移動電視內容製作上。
但實質做些甚麼呢，拍劇？做歡樂今宵？做龍門陣？做新聞報道？抑或做鄭多燕？其實好多嘢可做。
我當晚去睇100毛就好深感受，一班年輕人，阿曦都係30歲左右。
香港人創意好強、創作能力好高，我哋唔係去抄咩「（中國）好聲音」，香港人會做好多原創。
我仍然唔會亦唔想放棄電視內容製作，現在電視與互聯網已分不開，至於係電視劇、電影等其他，仍有很多可以發掘。
iMoney：一年前你已在專欄問政府，有邊個官員知100毛係咩？現100毛已成為不少年輕人的指標，你認為走這類路綫的新媒體是否一條出路？
王維基：唔知，如果知，好多老闆已經花錢落去。當晚我唔知在場二三千觀眾的諗法，但我隱約聽到台上得獎嘅人講，呢個係「小眾」，其實呢個世界就係由好多好多小眾組成。
世界趨勢是，唔好同我講權威、唔好同我講Role Model（榜樣），所以Dickson點解咁受歡迎。
我大學時人人好仰慕做AO（政務主任），AO係精英好威，現在有冇人崇拜精英？
我哋以前好崇拜李嘉誠先生，佢做生意好叻，但現有無人崇拜做生意好叻的人？
世界係變咗，大家係想要Peer（同輩），你唔好以為你叻過我，反而鍾意那些跟我差不多的！
我好鍾意100毛，但佢都係走緊小眾，無綫仍然係Mass（主流），社會就係由好多好多小眾組成，可能媒體都遇到呢個挑戰，已經沒有一個媒體的影響力是最勁的了。
iMoney：小眾可影響到全香港？
王維基：我覺得有啟發性！令好多想做媒體的反思。他們走自己獨有的氣味內容，做自己鍾意做的，不會強來。Dickson本身是Editor，是個宅男來的，他不是一個演員，唔係Package出來Design出來，佢只係做番自己。
但今天好多製作人，會改變自己做不擅長的東西遷就市場，夾硬去遷就件事，遷就到一個地步，你看到今天的演藝界有好多古靈精怪的東西，
我覺得好多人講嘢九唔搭八、好多人出賣自己、出賣自己靈魂！香港好多製作人係咪可以守番條綫？
輸過3次網媒唔易做
iMoney：作為生意人，你覺得如100毛的新媒體模式賺唔賺到錢？
王維基：看你的投資取向是如何，投資中電（00002）一定賺到錢，回報係3厘，買滙豐（00005）係6.5厘，你投資呢啲（100毛），係New Adventure（冒險），一爆可能係幾百個%回報，但亦可能輸九次先賺一次。
我投資都輸咗好多次，我1999年搞iChannel，那時（員工）二百幾三百人㗎，還未搞香港寬頻的年代，當年已做互聯網內容，當年如《am730》Alan Lo（盧覺麟）、Danny Fung（馮振超）、何安達（前特首辦新聞統籌專員）已在，好多精英，但最後都輸咗；跟住我又搞bbtv（香港寬頻）新聞台，都輸；跟住到電視又輸啦，做內容係咁㗎啦！
iMoney：這次再搞電視的規模會是多大？
王維基：太早講啦，還有一年，一年變化可以好大。
iMoney：100毛不用牌照，都可在大電視看，從中可有新思維，做些不用受制於牌照的東西？
王維基：不盡相同，而據我知他們經營也相當困難，網上廣告收益非常細，就算做得大，都唔會有人24小時開住網台。好似Netflix、樂視（LeEco）已賺錢了嗎？仲係輸緊好多錢，仍未有人由正途合法網上電視賺到錢。
iMoney：如你所說，香港有一班不同DNA的創作人，但有舊一輩人覺得，現今年輕人是廢青、讀壞書，又或賺不到錢買不起樓就是失敗，你如何評價？
王維基：因為一部智能電話，這一代十幾歲的年輕人，知嘅嘢In Depth（深入）過我們，他們對情愛恩怨社會複雜性的掌握，超乎你我想像，現在大部分後生仔係超級演員。
現在的年輕人咁精靈，拿住部電話接觸無限廣，Google Search能力高過你，他們睇的東西遠多於我同你，你根本掌握不到他們的智慧去到邊。
我唔識評價，他們根本就高過我，我唔係想擦年輕人鞋，我每次同佢哋深情交流時，我都愕然，乜你哋已經去到咁嘅Level？我完全Out晒。他們（的能力）並非一般家長和四五十歲的人可以想像。
一切決定於他們的Attitude（態度），積極定負面，積極的話Power好勁，如負面的就好頹，年輕人好睇他們自己心態！
(節錄)
全文刊於《iMoney智富雜誌》第432期（收費閲讀）
iMoney智富雜誌facebook
撰文 : iMoney智富雜誌
