藍橘子：同女朋友玩遊戲千祈唔好贏！

有時一大班朋友去CAFE，幾PAIR情侶玩遊戲，女朋友無論贏定係輸，都係笑嘻嘻咁，表現得好大方。不過如果同我兩個人玩，情況就完全唔同晒！係完全唔同晒啊！

佢好似絕對唔容許自己輸畀我咁，點解喺外面同其他人玩就可以笑嘻嘻，對住我一輸幾局就變身做母夜叉！點解？！

唔知點解，我輸畀你我就特別唔忿氣！

同女朋友有時搭緊車，或者食飯等緊位時悶悶哋，都會搵啲小遊戲解吓悶。除咗前幾篇介紹過嘅『扮唔識』之外，仲有啲普通少少嘅。例如手機小遊戲咁，當佢處於劣勢，就會撥開我隻手，激動啲甚至會成部手機搶走…直到確保自己贏，先至畀返部手機我。

另一個經常玩嘅遊戲，就係每人放一隻手喺枱面，猜包剪揼，邊個贏就打對方，輸就要縮。起初都玩得好守規矩，但戰況越來越激烈，女朋友就變成贏又打，輸又打…

打都唔緊要，佢仲要縮起另一隻手。即係我又打佢唔到，佢贏同輸都要打你。

唔玩呢個遊戲啦，妳贏同輸都打人嘅。

係啊～

女朋友好坦誠咁答我。

又有一次玩大富翁，兩個人玩大富翁其實好易分勝負，見地就買一定無死。不過咁，女朋友真係惡過地產霸權…

唔得！唔准買呢度！

吓點解？

呢個地區刻咗我個名！

最後，女朋友用：

你鍾意海，畀長洲你。我鍾意山，同我換太平山！

為理由，我好快就破產…

究竟女朋友係有頭腦定係奸狡？！我分唔清…

有次叫我教佢玩象棋，喂大佬啊！象棋係屬於男人嘅世界，係一場戰爭啊！我點可以輸呢？所以我決定唔讓佢，殺到佢片甲不留！點知，真係人算不如天算，天有不測之風雲，玩咗無耐女朋友已經毫無還擊之力，就喺呢個時候…

棋盤上出現咗一隻腳！

無錯！係一隻腳！

我女朋友嘅腳！

呼呼呼呼呼呼～

佢嘴裡發出吹風聲，再用腳掃走晒上面啲棋…

做咩啊？！

我問。

有龍捲風吹襲，所以你全軍覆沒…

女朋友答得非常認真。我望住飛晒出棋盤嘅士兵，腦海不禁幻想千軍萬馬被一個巨型龍捲風捲到半空再跌返落地變成肉醬嘅慘況。

我認輸，對住龍捲風，有乜辦法唔認輸呢？

點解每次玩遊戲，女朋友總係出茅招，務求要贏我為止？

因為佢知道，同外面嘅人玩，佢唔可以咁做。

但係當兩個人，對手係我，我就會讓畀佢贏。

佢知道就算我輸咗，都絕對唔會發佢脾氣。

但佢會。（細細聲）

原文刊於藍橘子facebook，獲授權轉載。