97前無攞BNO都可以再申請？
發布時間： 2016/03/04 17:05
最後更新： 2019/12/05 13:38
▲ 相片來源：追夢‧闖蕩‧看世界facebook
喂！ 又話BNO 97前冇攞就呢世都攞唔返嘅？係嘅， 但係唔可以再攞嘅係BNO呢個國籍（係國籍， British National （Overseas） 都係其中一種英國籍British Nationality）。
而你冇擁有過一本自己嘅BNO passport唔一定代表你冇呢個國籍（喂！ 好玄！）。
如果你97前有攞過BNO passport固之然係一定有得繼續攞。如果你出世後至未夠16歲呢段時間， 你家長拎過BNO passport， 即使你冇攞過， 你係有可能已經擁有BNO呢個國籍！ （97回歸後出世唔使諗， 冇你份）
雖然呢d case唔多， 但真係有！ 我就係例子， 我就啱啱拎咗自己第一本BNO passport。
點解有可能？
話說好少人提過， 98年前出嘅BNO passport有樣野叫included child。
即係家長（通常係呀媽）可以將未夠16歲嘅仔女個名寫落佢passport， 佢就可以拎住佢本passport就咁帶埋落咗名嘅小朋友過關， 一本passport兩個人（甚至更多仔女）一齊過關。
寫咗入去嘅小朋友， 即使佢冇自己嘅passport， 佢都擁有同佢家長一樣嘅國籍， 都係用呢個國籍過關。
即係如果你家長BNO passport上面有你個名， 即使你從來冇攞過自己本BNO passport， 你都已經擁有BNO呢個國籍， 有權拎返本BNO passport！
即係呢情況就好似你回歸後自動被中國籍咗， 即使你從來冇攞過特區護照， 你都係有中國籍（除非你冇中國血統）， 除非你主動申請放棄。
英國國民海外（BNO）國籍都係一樣， 你有呢個國籍嘅話， 除非你主動申請放棄， 否則無論你有冇有效BNO passport， 你嘅BNO國籍仍然存在， 所以無論BNO passport過咗幾多年冇續期， 只要你冇主動申請放棄過， 你嘅BNO國籍仍然終身有效， 幾時都可以俾錢拎返本BNO passport。
咁真係俾我搵到呀爹呀娘響我出世後16歲前拎既passport喇， 咁點睇有冇呢？
以下係我同我呀媽嘅真實例子， 如果唔同時期可能少少唔同， 不過唔難睇嘅， 主要係有3頁：
1.個人資料頁
人人都識睇， 好standard。有一項Children/Enfants， 如果係0， 你可以收工。我呀媽係1， 佢寫咗一個細路落去
2. 有一頁叫Children/Enfants（P.2）
會有小朋友姓， 名， 出生日期， 性別。
3. 有一頁叫Offical Observation （P.4）
由於BNO係必須擁有香港永久居留權， 有乜事俾人遞解出境， 掟唔到你返英國都可以掟返香港， 會有一頁係講居港權。而除咗護照持有人， 即係大人嗰段之外， 另外仲會有段有小朋友名同身份證號碼。
媽呀！ 真係有呀！ 真係有呀！ 咁點申請返？
關於online application嘅catagory， 根據我同其他網民嘅申請經歷加佢個網嘅description，可以十分肯定係揀First British Passport， 呢個case申請係比普通過期換新煩勁多， 查夠你祖宗三代， 多好多野要填。
至於其他一本換一本， 無論我細佬細路換大人定我呀媽過期超過10年， 照揀renewal一樣OK。
如何填form
填form咪就問你咩填咩， 都係差唔多， 淨講重點
- Was the applicant a British national at birth？
Yes （除非你唔係97前香港出世/唔係出世就有香港永久居留權）
- Has the applicant been included on ANY passport before？
Yes
- Parent/Grandparents Nationality
有BNO/British Citizen既寫British， 如果無BNO/BC有香港永久居民身份證寫HKSAR， 得其他就照寫（e.g.大陸=Chinese）。
- Additional parent information
Mother HKID： Xxxxxxx（x） ；Father HKID：Xxxxxxx（x）
- Additional grandparent information
（未必真係要身份證號碼，我有寫，多咗無壞， 知就寫， 唔識英文的話順序係呀婆呀公呀嫲呀爺）：
Maternal grandmother HKID： Xxxxxxxx（x）； Maternal grandfather HKID：Xxxxxxx（x）； Paternal grandmother HKID： Xxxxxxx（x）； Paternal grandfather HKID：Xxxxxxx（x）
- Additional information
My HKID number： Xxxxxxx（x）
填哂就俾錢喇， 俾完會有個pdf出咗黎， 你要print有barcode嗰頁（Declaration form）同副署form出黎。
規矩話上一本passport認唔到你個樣就要副署， 咁呀曾經小朋友你根本連個BB樣都冇響呀媽passport度， 點求其格硬都冇可能認得你㗎！ 所以你簽硬㗎喇！ 副署同相既要求就自己睇喇。
副署要求可睇。
相最緊要啱size同唔可以笑， 木口木面就啱喇， 要求可睇。
所需文件：
§§明文規定必須：
- Declaration form（Barcode form）
- 副署form
- 相×2（其中一張要副署，只係一張，唔好簽哂兩張）（！！！提提你除非你本特區護照一個月內新攞， 如果唔係唔好寄同一張相， 我呀媽就係咁俾人打回頭話張相唔係一個月內近照， 要佢寄過另一張相去英國！！！）
- 香港永久居民身份證彩色影印本
- 其他非英國護照（如有， 例如特區）正本或每頁連封面封底彩色影印本
- 一年內英文住址證明正本或彩色影印本（最好政府信 e.g. 稅單， 選民登記）（同一個地址可能好多寫法， 填form時最好跟住址證明填一模一樣）
- 舊BNO （如果唔見咗要報失， 寄報失紙）
- 相片證明（即係其他有你樣有名最好有埋更多個人資料既野證明呢個樣真係你， 例如回鄉證， IELTS成績表）（如果你身份證同特區護照個樣同你交嗰張相唔多似樣先要）
§§冇明文規定必須， 但係歷史話你知要：
- 出世紙正本 （我寄彩色影印本俾佢，passport office要求寄埋正本）
- 父母香港永久居民身份證彩色影印本
（以下文件我寄彩色影印本俾passport office，佢冇再要我寄埋正本。另外d case一開始冇寄，passport office要求寄正本）
- 父母結婚證書正本或彩色影印本
- 父母出世紙正本或彩色影印本
以上全部寄哂去英國！
至於同一本護照上有你呀媽， 你， 甚至更多兄弟姐妹可唔可以同一時間續。
如果一大拖一細絕對冇問題， 將申請文件分好兩紥， 再放同一個公文袋， 連嗰本一齊既passport寄去就得， 穩陣嘅加張紙雞乸咁大隻字寫住included child。
至於一大拖幾細， 建議如果2個或以上小朋友響同一本大人passport又同時去攞新既話， 可以一開始寄哂正本跟大仔（女）， 同時影印一份跟細仔（女）（s）再同一包野寄過去， 好有可能唔使補交， 唔使響度無限輪迴。
有case一次過寄哂一大兩細三份申請過去，而一開始冇寄自己加父母出世紙正或副本， 同父母結婚證書正或副本去， 跟著兩個細都同時被要求補以上嘅正本。
補咗去之後因為大女個申請處理咗先，所以大女連呀媽嘅passport一次過批左，但passport office可能將d申請分開咗，細女要等大女補去既父母出世紙正本同父母結婚證書正本返返黎香港，再補寄過英國先得。
而響我個case既經驗父母出世紙同父母結婚證書如果一開始寄去副本都收。
任何原因無法順利交出查三代文件
至於如果父母離婚無法聯絡， 父母唔係香港出世， 自己或者父母係非婚生子女， 唔知袓輩資料等等狀況令你無法順利交出查三代文件嘅話， 根據國籍嘅概念如果佢本身俾得你，你已經擁有，應該都冇影響， 但可能會增加申請嘅複雜性。
建議你地響開始上網填form前盡可能搵， 同有乜係覺得相關既都可以有多無少俾住先。
例如離咗婚，張結婚證書掉咗冇留低咪交離婚文件再填表時響 additional information 講發生咩事報定案， 等佢唔使再問d你根本拎唔到出黎既野， 答定d你估到佢會問既問題， 要問就問第二d。
以上我冇試過， 亦都冇聽過申請例子， 純粹個人估計，有人係呢d case嘅話歡迎share申請經歷。
佢真心查得徹徹底底！ 我諗佢對於呢d本身響人地本passport上面得個名同身份證number， 樣都冇個既人身世要查得好清楚。
所以如果你怕麻煩， 可以一開始寄得都寄正本俾佢， 佢係會寄返俾你 成個過程比其他申請耐都幾多， 我細佬係自己有本兒童轉大人， 勁快！ 不過搞完一大輪，
我終於拎到， 俾事頭婆照住喇！
感謝徐多多同我分享埋佢既申請經歷， 令文章更豐富， 已獲授權轉載。
原文刊於作者追夢‧闖蕩‧看世界facebook，獲授權轉載。標題經TOPick 編輯修改，原題為《喂！ 又話BNO 97前冇攞就呢世都攞唔返嘅？》
撰文 : 追夢‧闖蕩‧看世界
