一間好學校的定義

近來，不同的媽媽GROUP都係度討論小朋友揀幼稚園，係呀，我個女女宜家先9個月，已經有媽媽討論幼稚園了。

先唔討論係唔係太早，今次想講既係：

咩先係好既幼稚園呢？

係媽媽GROUP入面，我見到佢地講既都係大校…而佢地選擇既原因，好多都係因為個課程啦、功課量啦…甚至有無得上網睇小朋友相、有無CCTV等…

睇到呢度，我相信大家心入面都好多感受。

作為一個幼稚園老師，同時，作為一個新手媽媽，我如果要幫小朋友揀學校，一定唔係因為佢出唔出名，佢學校網上資訊有幾多，佢個課程係行蒙特梭利定瑞吉歐而揀…

揀幼稚園既重點，係學校入面既老師。一間好學校，佢一定有一群好老師，而咩係好老師？

好老師，係不論外表，係講內在，包括行為同態度。

好老師，係唔介意自己有幾傻婆，雖然我地都仲係可以好靚，不過記得我page都講過，你會發現呢D靚女總係有D好方便既髮飾、手又有紅藍漬，又有橡筋係手扮手鏈，仲有一D小朋友送俾你既貼紙，身上面有小朋友漏左而你又怕唔記得俾返佢而夾係衫既髮夾…當然有D好老師都仲係可以好整潔，唔會有以上情況，不過以下既情況就一定走唔甩。

當中最緊要，就係成日都好忙，但仍然保持笑容。

係架，有時都保持唔到，不過面對小朋友同家長，大家只可以係心入面吶喊!

不過要記得，老師會大聲話小朋友唔代表老師唔好，就係上心，老師先用上死幾萬個細胞既力話小朋友，當然，老師都唔係變態，我地真係忍無可忍先話，所以就算老師話小朋友，都可以系好老師黎架。

不過一間好學校，老師一定做得好開心，佢地一定係成日笑!

雖然到到放工個一刻，仍然忙緊…

哈哈哈哈，講到自己好似好偉大咁，但都只係希望各位媽媽唔好只係睇學校，其實入面既老師先係重要。

點解咁重要？因為老師好，真心對小朋友，為小朋友著想，咁自然就會用心教佢地，咁相對起任何野，我相信一個老師用心教出黎嘅小朋友，一定得着唔少。

學校唔一定有名氣好，有時可能你屋企附近個間都好好架!因為，入面正正有群默默努力既好老師!

原文刊於VVinnie Facebook，獲授權轉載。