點解買樓投資要買爛屋？

「爛屋多人吼？唔係嘛？」阿媽喺微信睇到單新聞笑住讀出嚟。

以前我都唔信。原因係我哋呢啲普通人，一生人或者只一次機會買樓，揀樓嗰陣發現若非身家清白、純潔無瑕，絕對睇唔上眼，因為我下半生好可能都住喺入面。

但對於投資者嚟講，買樓同買件貨無乜分別，都係租出去啫，又唔係要同層樓過人世，執番靚租得出咪得囉！用咁嘅角度嚟睇，爛屋就係佢哋嘅尋寶聖地。

話係尋寶，因為業主好可能基於物業殘舊，提供較大議價空間，增加「執平貨」機會。精明買家當然仲會透過發掘屋內缺點，例如牆身滲水、牆紙甩皮甩骨等來挑剔業主，爭取減價，減減下，買到比市價平一、兩成嘅低水盤亦唔出奇。

試諗下，300萬樓平一成，即係慳咗30萬，相當和味。其實投資者翻新物業出租好少落重本，一般用幾萬銀裝修。我所認識嘅投資客，揀裝修物料時第一睇價錢，第二睇樣，耐唔耐用乃其次。

細心留意的話，坊間大多數租盤都係油漆牆（梗係啦，一罐油幾百蚊，髹成間屋都無問題）；用磚地或者膠地板，前者易打理，後者好處係唔怕滲水。雖然膠地易刮花，就算換過晒亦只係有限錢，三、四百呎屋幾千蚊都搞得掂。

Recap一次：低水買，幾萬蚊執靚，以市價或者貴少少價錢出租。你話爛屋多人吼係咪正常先？

文章刊於《晴報》，標題經TOPick 編輯修改，原題為「爛屋多人吼？」

《晴報》facebook