在日香港人：在日本旅遊要注意的N件事

之前另一位小編所寫的Airbnb受害事件，意外地受到大家關心，當然也有各種不同的評論。鑑於有不少朋友對於其實在日本到底有咩潛規則實在不太清楚，所以小弟決定嘗試寫一寫自己居住在日本5年的個人感想啦。

其實所謂潛規則，並唔係話我唔講，就無人知無人估到。我地所指的潛規則，即常識、Common Sense。當然日本潛規則多到爆炸，尤其是職場上。但今日小弟只打算講講旅行時候的Common Sense。

日本最基本的生活潛規則，就係唔好騷擾到人。只要你做的事情唔會騷擾到其他人，基本上無人會理你，包括你肌肉男着Lace裙出街。而如果你的行爲騷擾到其他人，日本人並唔會直接同你講，只會暗地裏不滿，對華人/旅客/香港人減分。直接d講，即係影衰香港人。

1. 請將音量收細

夜深將音量（包括傾計、電視、手機遊戲、啪啪啪、腳步聲、行李聲等）收細，應該唔洗解釋啦下話？

無論你住Airbnb定酒店，日本因為地震防災關係，牆壁好少係石屎，多數係木材亦較薄，隔音差到你唔信。加上日本住宅區好靜，如果你開窗的話，隨時唔止隔離左右單位，隔離左右Apartment都聽到你講野。

而日本電車巴士車廂、商店、餐廳等地方，如果其他人都比較安靜，麻煩都自動自覺收細音量比較好。好多時候對於香港人普通的説話音量，係日本已經係好大聲，何況係成班朋友去旅行興奮起上黎大生講大聲笑呢。仲有就係Whatsapp語音訊息，可免則免啦。

小弟自問同大部分日本社畜一樣，返工放工果程電車就算無的坐低補眠，都想耳根清靜（然後企係度都訓得着）。

2. 切勿係唔係都影

我都好明白短裙學生妹、Kawaii小正太小蘿莉、和服美人、壽司師傅個個都好吸引，不過係日本，好多人其實對於被偷拍好反感。如果對方係小孩或女性，對方直頭可以大叫「警察叔叔就是這個人！」。日本手機同相機之所以無得熄影相快門聲，正正就係防止偷拍。就算大家並非有心影人，都可以注意返影相的時候鏡頭有無令人覺得你影緊對方，從而令人反感。

另外，商店内就最好唔好影相喇。如果真係想影，向店員做個影相手勢，問一句「Photo OK?」，得到許可就你影得安心，店員又放心。請注意，香港人好喜愛蒲的Game Center，夾公仔機係唔比拍攝架。

3. 唔好以為無人識聽廣東話

去到一個異語言地方，好自然講野都會放d。小弟係日本講粗口仲多過係香港。不過，其實香港作為個人去日本次數最多的城市，加上大量去日本留學、工作、居住的香港人、廣東人、澳門人，又點會無人識聼廣東話呢（仲要係旅遊區添）？

小弟見過無數次香港人大大聲批評店家商品食物、評論路人樣貌衣着，甚至係餐廳大談昨晚性事。小弟每次被廣東話評頭品足時，都真心好有大叫我其實聼得明的衝動。

其實就算日本人聼唔明廣東話，從熱情目光、豐富表情動作，都略知一二你講緊咩啦。

4. 請到指定地方吸煙

日本同香港唔同，好多地區係禁止火車頭的。如果想吸煙，就要去到指定地方。

• 指定吸煙地點，基本上你見到一大班人企定定集會式煲煙就係
   
• 餐廳的吸煙席
   
• 吸煙室，多數係大街上一個鋪位/商場機場内一間房，毒氣室式吸煙

5. 如有大型行李請盡量避免通勤電車

日本通勤電車有幾恐怖，香港人係好難想像得到。不過就算幾逼幾恐怖，每個社畜心入面只係懷住絕望心情只希望準時返工。如果呢個時候遇上大型行李，先唔講閣下伯母會受到幾多關懷，小弟都相信你要逼得入車廂係同參加奧運難度有得揮。

6. 行路請留意路面情況

小弟每次返香港，最唔習慣就係香港人行路習慣。急煞、U-Turn、切綫、一字排開、瘋狂撞袋...同朋友訴苦，朋友都係叫我自己小心、用個又硬又唔怕撞的手袋同對方撞過。當然呢個係香港人習慣，我返到香港只好好好保護自己，唔能夠大聲嗌唔好。

不過日本人其實有自己一套行路方法。基本上同安全駕駛一樣。行走方向好分明，大家只需要觀察大家行走方向，融入其中就可以。如果需要轉彎、掉頭，最好事前慢慢減速並慢慢往想去的方向移動，唔好突然轉方向，好容易撞倒人。日本人手袋並唔Prefer用作格鬥，盡量就注意唔好撞倒人/袋，如果真係撞到人/被撞到，都應該帶愧疚表情點頭講聲すみません（Sumimasen)。一字排開慢駛會阻住地球轉就唔洗解釋啦？

係啊，係好煩，甚至係好煩。居住在日本的我，有時都覺得香港Free好多。不過，旅行，就算你唔打算融入當地生活，至少都應該入鄉隨俗守當地規矩。

當然啦，常識呢d野，就算你唔理，都唔會有警察拉你（除左偷拍同隨街吸煙同嘈到有人報警），所以Topic咪叫「最好注意的N件事」，唔係「一定要守的N件事」。

其實應該仲有好多注意會比較好的事情，不過小弟懶又見識少，就寫到呢度。

其實大家只要旅行時唔好只顧住自己，花少少時間留意下身邊日本人做緊咩（例如談話音量、點行、有無啤行你），都應該會sense到應該點做。

歡迎各界人士比意見。

完！！！！！！！！！！

原文刊於在日香港人facebook專頁，獲授權轉載，標題經TOPick修改，原題為「在日本旅遊最好注意的N件事」。