充滿童年回憶味道的零食【下集】
發布時間： 2016/07/20 15:06
最後更新： 2016/07/22 17:41
▲ 相片來源：立雜良品Facebook
充滿童年回憶的零食再嚟Round 2！人久唔久就鍾意懷緬吓舊時，我哋呢班港女今次就同大家重溫吓童年回憶！話說呢堆零食晒冷擺喺枱頭時，都真係幾令人懷念，背景音樂隨即響起：「我的青春小鳥一去不回來……」（嘩打冷震）其實仲有好多零食都想講㗎，你哋都可以留言講吓你兒時嘅至愛！
1. Kinder奇趣蛋
慳妹︰「Kinder出奇蛋，一次過滿足你三個願望！」我細細個就聽過呢句嘢㗎啦！自細都係咁慳嘅我一直都覺得出奇蛋好抵㗎，有得食有得玩，仲有次次唔同嘅驚喜添喎！
大個咗好耐冇食出奇蛋，但可能大家都知道，而家嘅出奇蛋已經唔同以前，得返半邊係朱古力，另外半邊裝玩具，究竟係因為衛生啲定係因為成本平啲呢？
而家嘅Kinder出奇蛋多咗鬆脆可可球，口感豐富咗，但同時啲朱古力亦都甜咗。至於入面嘅玩具，冇運氣又唔擅長手工藝嘅我依然係只係抽到系列嘅配角，覺得啲玩具好難砌。人長大了、口味可能唔同了，但運氣及耐性仲係冇變（感慨mode）
2. 嘉頓朱古力手指
客串隊員馬力高：關於朱古力手指的二三事
關於朱古力手指，既熟悉又陌生。面熟，全因小一的第一天，媽媽把一封壓歳錢，放在我的書包內。雖然媽媽千叮萬囑我，不要打開那個紅包。但當我站在那個小食部，遙望裡面七彩萬千的小食，腦內泛起了甜甜的味道，最後忍不住，打開紅包，拿出了一張十蚊紙，偷偷買下這些手指。
手握食物後，回頭卻看見媽媽站在學校的門前，狠狠的望著我。人生第一次偷食事件，瞬間失敗告終。
誰的童年不喜歡甜食，卻讓人換來胖胖的身型，幾經掙扎，用了多少時間，才能回到世間接受的標準。結果，曾經讓我歡喜的食物，今天只要輕輕觸碰，就會換上比當天媽媽更惡的嘴臉，用更嚴苛的方式，去大力批判，還拿出了大量的數據，去分析其好與壞。
無論朱古力手指包裝不變，味道不變，它卻已受到你的千夫所指。
愛吃甜食的你，遠去了。就像幻想中的糖果屋，就像快樂的波板糖，任你腦內的阿樂，如何努力翻箱倒櫃，如何總動員搜索，成長，總會讓一些東西，遺留在某個角落。
或者，我只能偶然買下這包恩物，在有限的卡路里底下，與媽媽一同回味那段時光。
3. BB糖
鹹魚：讀書時代，除咗食媽咪麵可以有「藍毛毛演奏會」，食呢款BB糖都可以有歌聽！其實有好多牌子都有呢款糖，不過唔知點解（無論咩色）都係一樣嗰隻波子汽水味，同埋無論幾厚，都係吹3下左右就散。
我係今次試食嘅時候有朋友講我聽先知，原來咬住BB糖「吸」氣比起「呼」會B得更大聲！（會唔會太遲知）
快啲買返排同朋友一齊玩BB糖演奏會啦！（其實應該吹嚟吹去都係同一個音，分唔到高低音，有無人要挑戰下？）
4. Yupi Pizza糖
域拖：我小學雞嗰陣就好膚淺嘅，見到五顏六色嘅嘢都覺得靚，所以呢隻同埋漢堡包糖就係我童年最愛之一。
淨係個包裝咁old school已經贏晒啦！一包有六片pizza，講真味道真係冇咩分別，全部都差唔多味，唔同漢堡包糖（最鍾意黃綠色嗰層），不過夠晒抵，三兩蚊就有六塊，自己獨食或者成班小學雞些牙都得，手工認真hea hea哋，個pizza面睇落好似溶咗咁，不過咪當係melting cheese囉，冇所謂啦
5. 泰式特產？可口魚串
些王：話說細個住嘅地方，對面有一間士多仔，不常開，好鬼有性格㗎。當佢開嘅時候又撞正我獲准躝街，都會去𥄫𥄫，睇吓阿姨今日賣乜先，賣乜先~通常都會見到收銀個位插住呢排嘢，無錯，係一排好似孔雀開屏咁插，行近啲仲聞到陣腥腥地，又好似好惹味嘅香氣。
之後都試過叫阿媽買，不過佢第一個反應就例牌話無益啦，所以呢排魚片喺我嘅心目中係有種這麼遠、那麼近嘅感覺。
唔知過咗幾耐，有日阿媽買完餸返嚟，就遞咗呢排嘢俾我，仲講咗句：「原來好平咋喎！」好明顯呢個係令佢買嘅最大動力（唔係因為知我想食），是但啦，細個有得食就咩都唔理啦！
其實呢啲所謂嘅「魚串」，甜甜腥腥咁，唔算特別好食，反而係細個恨咗好耐終於得到嘅心情，到而家都仲記得。
原文刊於立雜良品Facebook，獲作者授權轉載。
標題經TOPick修改，原題為「童年回憶的味道Round 2！」。
