一個人的旅行其實很快樂

識揀，一定係一個人去旅行。一個人去旅行，唔洗就朋友大假，唔鍾意shopping嘅唔洗特登陪朋友行商場，唔想捱貴酒店又可以book青年旅舍，夠晒隨心，無交好嗌。

雖然話一個人可能會悶啲，不過去到外國，大把旅客同本地人見到你一個人，都會好樂意同你傾計。我遇過最多係旅舍或者店鋪老闆，見你一條友就過嚟r水吹。加上全程影吓相呀，search吓下一站去邊、點去，其實都唔係想像中咁無聊架咋。

試過獨遊，就真係返唔到轉頭了。

因為從此，出走對你嚟講實在太輕便了。你已經有一套旅行用品放好咗喺行李喼／backpack入面，每次check到有適合機票、酒店，用手機app訂就搞掂，執兩件衫就可以爽快起行。旅行變成好似weekend約人唱k一樣平常，一個月一次都得。

嗰種恐怖程度係，你唔再覺得買件一千蚊嘅靚衫係有意義嘅，寧願要嚟買多張平機票。每次做決定嘅過程都會變成：三百蚊一次放題？去台灣單程機票先四百；換iphone 7？但歐洲機票最抵三千幾咋喎。每一次潛在消費都變成「可以去到幾多次旅行」，嚇到你錢都慳埋（不過洗咗喺旅行），係咪好正先。

而對我嚟講，獨遊不是因為毒，而更重要係平時對得人多，我好需要「cave time」，一個人靜吓。一個人好悶？你開玩笑嗎？我就係想一個人，唔洗趕行程，可以去咖啡店睇書，去海邊坐吓，喺酒店歎個泡泡浴，優哉悠哉！

所以唔好話我成日去旅行喇 —— 讀萬卷書不如行萬里路，媽媽教架！

原文刊於作者B612博客，獲授權轉載。