鄭丹瑞：50億元的教育改革

有特首參選人公布教育、稅務及房屋三大範圍的政綱，指出現行教育政策在理念及執行方面都出現問題，本年度教育經常開支達747億元，佔政府經常開支21.5%，是回歸後最低，這位特首參選人建議每年增加50億元的經常性教育開支。

「參選特首嘅人為咗達到入閘嘅目的，真係無所不用其極！」損友甲忍不住口，又在月旦時事：

增加50億元經常性教育開支，先唔好話呢個名有幾誤導，我一聽仲以為香港教育政策都未搞掂，竟然去搞『性教育』添！

算，當我無知兼心邪，我亦唔準備批評呢位提出50億元教育支出嘅參選人，佢本身喺過去五年對教育政策有決定性嘅話事權，點解佢明知不足，但係過去五年乜都唔做？依家先做?!

我淨係想知道，呢50億元到底對學生嚟講，有幾多實質性嘅幫助？定係反而可以助長更多人成立『求學只是求分數』嘅學店，去俾更多功課啲學生？去搵更多香港家長着數？！

「50億元，可以呃到班天真嘅民主派，但係可以買番因為頂唔住功課壓力而自殺嘅學生條命咩？」損友乙忿忿不平說。

「唔該佢慳番呢50億元，要嚟做其他民生發展啦！未來五年，聘請一個對教育真係有認識、有理念、有熱誠嘅教育局局長，五年二千萬，已經足夠有餘！企圖用錢去撫平大家對今時今日香港教育政策嘅不滿，係對香港家長嘅一種侮辱！」好事之徒講出這50億元的重點。

【其他熱話】現代孟母舉家移居沖繩：香港教育太「Chur」

【其他熱話】香港有多少的「教養殘障」父母？

【其他熱話】林鄭月娥VS曾俊華 邊個教育政綱更「貼地 」？