懷孕必須戒咖啡？孕婦實測Starbucks低因咖啡

「我向來每日一杯咖啡，依家無得飲好唔慣！」阿Man係我中學同學，幾個月前有咗，對於要限飲咖啡覺得好難過。

當時我輕描淡寫建議佢飲低因咖啡過口癮，無諗過佢因為我一句話而做咗唔少功課，後來仲搵埋我，針對市面上咖啡做咗個小調查。外國好多連鎖咖啡店，會將飲品嘅營養及咖啡因列喺網站，但香港並唔常見。

上個月阿Man透過電郵和電話聯絡連鎖咖啡店Pacific和Starbucks，以及專賣咖啡粉囊嘅Nespresso，表明自己懷孕，希望了解幾款常飲咖啡（包括低因咖啡）嘅咖啡因含量。

其中Nespresso最有效率，即日電郵咗各種產品嘅咖啡因列表畀我哋參考。原來現時Nespresso所售嘅20多款咖啡粉囊，一般每粒含59-99毫克咖啡因（除咗一款叫Kazaar特別高，一粒有142毫克），基本上日飲一杯都唔會超出孕婦建議攝取的上限200毫克；另有4款低因咖啡粉囊，每粒咖啡因含量都唔超過4毫克，睇完自覺飲得放心。

另外，Starbucks亦回覆，一份Espresso約有75毫克咖啡因，而一杯Tall size嘅Latte或Cappuccino都含有一份Espresso，即係都有約75毫克咖啡因；但留意，如果你叫Grande或更大杯就含有兩份Espresso，一杯已有約150毫克咖啡因。

改飲decaf（低因咖啡）又點呢？一份只有約3毫克咖啡因咋！阿Ｍan話佢以前好鍾意飲Starbucks嘅每日精選咖啡，但原來Tall size已有約195-270毫克咖啡因，依家都係唔飲為妙啦。

至於Pacific，上個月佢哋回覆暫未有相關數據，希望今個月取得報告再同我哋分享，期待收到佢哋嘅消息。

全文刊於《晴報》

《晴報》facebook

【延伸閱讀】可樂VS咖啡 飲品咖啡因含量比拼

【延伸閱讀】港式奶茶咖啡因勁過星巴克 飲得多會點？