80後P牌媽咪：點解糖水測試令準媽媽聞風喪膽？

「你體重超咗啲，出去約個期返嚟『飲糖水』啦。」咩話？聽到護士咁講，我個心簡直晴天霹靂。

「飲糖水」呢三個字，凡係大肚婆聽到都聞風喪膽。佢係一項產前測試，睇下你有無患上妊娠糖尿。有人覺得驚，原因係江湖傳聞杯糖水極度難飲；而Audrey之所以怕，則因為我寧舍為食，好驚驗到有問題，要按「糖尿餐單」嚴控飲食，日日篤手指監控血糖，於我而言簡直慘過苦行。

目前公立醫院只會為高危一族（即高齡、有家族病史、曾經生過超重BB或者本身超重等孕婦），喺懷孕24-28周期間「飲糖水」。雖然我唔想面對，但若果有妊娠糖尿又控制得唔好，可能會令胎兒過大、加大分娩難度，亦會增加畸胎、早產等風險，BB長大後亦較易患糖尿及心血管病。為咗小心駛得萬年船，我只好硬着頭皮赴約。

測試前一晚12點，我就要開始禁食，第二朝一早空住個肚去健康院報到。檢驗過程好簡單，到埗後姑娘會先幫你抽血，然後叫你喺10分鐘內飲完一杯超甜嘅糖水（有茶餐廳凍飲咁大杯，甜到乸喉），飲完坐低等兩個鐘，再抽一支血，咁就走得。

唔知係咪一時間吸收太多糖份，我喺等候期間覺得好暈，難怪姑娘唔准我哋中途離開健康院；另外我聽過有媽媽話接受唔到糖水嘅味道，等候期間嘔晒出嚟，前功盡廢，估計要約期重做。

同其他公院嘅檢查一樣，若果驗到你有問題，姑娘會打電話畀你跟進，否則你係唔會接到電話。好彩，呢關我亦大步檻過。

全文刊於《晴報》

《晴報》facebook

【延伸閱讀】懷孕保健學堂 孕前減肥或增妊娠糖尿風險

【延伸閱讀】拆解妊娠糖尿風險　醫生教你孕婦飲食宜忌

【延伸閱讀】妊娠糖尿孕婦子女 患糖尿機會高2倍