得公屋真的得天下？

公屋的吸引力有幾大？近日有名29歲青年被揭發身懷248萬元巨款，卻隱瞞房署申請公屋，結果被判監14日，緩刑24個月，罰款1.3萬元。

很多人笑說呢位青年很傻很天真，認為他有248萬元足以購買私人房屋，毋須以身犯險去呃公屋惹上官非。嫻姐想講，個個都想有個安樂窩，唔通個個都想買私人樓宇咩！

過往的年代，公屋是低下階層的容身之地，屋邨仔、屋邨妹呢D稱謂，有時難聽過粗口。時移世易，申請到公屋，被人形容為開心過六合彩，點解呢？

租金平到你唔信

公屋租金平是常識吧！當深水埗一間100呎劏房租金都要4千幾元時，300幾呎的公屋只需要二千幾元租金，環境舒適又唔使同人逼。私人樓宇更加唔使講，好似淘大花園，300幾呎盛惠15K，基本上成份糧都貢獻給業主，假如遇上貪婪業主就更慘，加租絕不講理，唯有年年搵屋搬！

點解很多人想住公屋，住屋花費減少壓力小，自然就有「閒錢」可以做其他事，例如一個月可以食多次自助餐，一年可以去多兩次日本旅行……

單位間隔實用

間隔實用，呢點是私人樓宇難以媲美吧!公屋沒有發水樓，沒有棺材式窗台、沒有腳頂洗手盤的機艙廁所，沒有鑽石型客廳，沒有多餘的走廊，充分利用每一寸土地，傢俬也不用特別訂做，裝修費用都慳唔少啦！

嫻姐平時睇facebook都見唔少裝修公司分享公屋裝修Case，日式風、田園風、甚至英倫feel都有，豪華程度堪比私人樓宇，自然就住得舒適，食得招積。

【延伸閲讀】港人首置上車盤暫推千單位 唐榮：公屋住戶今次發達了

完美的生活配套

公屋周邊的生活配套亦相當有吸引力，可謂一應俱全！你想食西餐？中餐？有，24小時麥記、大家樂、大快活領展商場內都有。平時要買餸煮飯？簡單，周圍一定有百佳、惠康、街市任你買。

部分屋邨甚至坐落地鐵站口，如坪石邨、牛頭角上邨、元州邨，交通便利過私人樓。更特別的是，個別屋邨坐落名校校網，小朋友可以在統一派位階段與人公平競爭，家長毋須儲過千萬買豪宅，毋須租用郵箱，不用快人一步，也可理想達到！

免費維修零煩惱

住屋最煩就是維修，特別是私人屋苑大維修的昂貴洗費，往往令人非常頭痛。辛苦十幾二十年先供完一層樓，結果要付維修費，其實都幾悲慘。

但如果住公屋就另一種說法了，公屋的樓宇維修費用完全由政府承擔，住戶要做的就是每個月準時交租和遵守《房屋條例》，非常簡單無壓力。

上車首選

先住公屋再轉居屋是不少人心中的目標！而公屋住戶就可享受「先上車」的優惠！何解？正因政府每次出售居屋單位，都會預留大量名額給綠表申請者，亦即是公屋住戶及部分合資格等候「上樓」的公屋申請戶！現時更有綠置居給公屋租戶選擇！上車話咁易！

嫻姐列舉出住公屋的好處，絕非鼓勵人人去申請公屋，畢竟公屋真的是給予有需要的人士租住，虛報資料去申請公屋更是刑事罪行。可惜現今樓價高企，政府的辣招愈出愈辣，反而推高了樓價，想買樓談何容易呢？