我的20小時生仔記：瑜伽球減10級痛楚真的有效

成日聽人講，生仔有十級痛。到自己生過仔就明白，最痛唔係臨門用力谷BB出嚟嗰下，而係漫長而折磨人嘅陣痛過程。

曾聽過一名壯婦分享，用咗幾個鐘就分娩成功，講到生仔好似食生菜咁易。不過Audrey我就無咁輕鬆，由陣痛到生，足足用咗近20個鐘，依家諗起都猶有餘悸。

我記得自己傍晚開始出現輕微陣痛，初時感覺與M痛無異，每隔十幾分鐘痛一次。去到半夜噩夢來了，每五、六分就感受到一次重擊，痛到我典床典蓆。若要我形容嗰種痛楚，我會覺得，好似有人當你個子宮係濕毛巾，係咁扭、係咁扭，仲愈扭愈大力。

原本我刻意忍痛唔叫出聲，後來實在頂唔順，發出痛苦呻吟。試幻想你瞓喺我隔籬床，夜麻麻見到此情此景，你都咪話唔恐怖。

【延伸閱讀】80後P牌媽咪：剖腹生產會影響BB健康？

「姑娘，我好辛苦呀，仲有幾耐先生得呀？」我撳響床頭鐘仔召護士求救。「我幫你睇下開咗幾多度啦。」眾所周知，子宮口一般要開十度（1度=1cm）先叫生得。當時姑娘喺漆黑中開着我盞床頭燈，昏黃燈光下，戴上白色手套往我下體一探。我期待佢話我知就快生得，點知佢居然話我只係勉強開咗一度。當下真係好灰。

另一位姑娘見我咁辛苦，好心提議︰「不如出嚟坐下瑜伽球啦，會舒服啲㗎。」唔少大肚婆懷孕時都會玩孕婦瑜伽，我好後悔自己無參加，因為坐過瑜伽球後，我真心覺得對產程有幫助。

玩瑜伽球嘅方法好簡單，首先要雙腳分開，然後90度坐直個人喺波上面印印下；其次亦可坐喺波上面，用條腰帶動屁部順時針轉動個波。

如是者，我成晚不斷玩瑜伽球，再唔係就走出走廊散步，日出之前終於穿水，子宮亦開夠六度，可以轉到待產房等生仔了。

【延伸閱讀】準媽媽妊娠腰痛　中醫教每日靠牆站5分鐘紓緩

原文刊於《晴報》，標題經TOPick編輯修改，原題為「20個鐘生仔大作戰」

晴報facebook