點解我不移民離開香港？曾智華：要走的應該是做得差的高官

近日，香港烏雲密布，人人怨天怨地怨政府，從未聽過咁多人同一時間咒罵林鄭月娥，這現象，兩年前，相信全世界無人估到，當然包括林鄭本人。十幾年前的老董及幾年前的梁振英出任特首時，也曾出現全城狂轟現象，不過，似乎無今次的形勢兇險。

事實，身邊不少朋友猛嗌移民，有的，真真正正在申請，令人萬般無奈。

小弟也被問：「肥碌，香港搞成咁，你仲唔走？」

我的標準答案：「有無再荒謬啲？邊個高官做得差，應該佢落台、佢走，為乜要我走？香港係我地家鄉，無人可以獨霸，除非你係潘頓！」

潘頓是誰？非馬迷都應該知，正是如今在香港馬場，贏到開巷，彈離第二位幾條街的冠軍騎師。因騎功高超，至今W咗一百四十場，人人口服心服，佢玩晒，無馬會主席總裁（中央？）照，純憑實力騎到光芒四射，當然獲馬迷擁戴。

政圈如馬圈，有十萬至百萬計觀眾，以雪亮眼睛睇住你出賽，做／騎得好，當然掌聲如雷（一如早年林鄭有guts到皇后碼頭，面對群眾解釋政府政策，民望贏晒），但做／騎得差，被噓爆，亦百分百正常。若他日潘頓走樣，結局必定一樣。

世界，並不屬於任何一個人，好的，請你留低，差的，請勿賴下去，留點尊嚴給自己。

我肥碌絕不會因任何掌權者表現差劣而移民，因無邏輯也。再講一次，邊個渣邊個下台，公家權力，絕不屬個人「財產」！