將整個東京帶來香港

港視主席王維基曾不下一次公開說，自己最想搞的還是免費電視。對於這個走投無路被迫出來的網購平台，愛行山的他這樣形容：「行行吓發覺此路不通，咪行另一條路囉！行行吓另一條路都唔通，又行第三條囉！」走了一大段路，如今以網際網路平台OTT（Over The Top）形式發展的HKTV Mall，終敲定在「對手」無綫電視台慶的同日；即11月19日開台，算是柳暗花明「又一城」。

▲ 網購台成敗得失，王維基坦言平常心對待。

15分鐘車程內必有商場，為何還搞網購？

你有沒發覺，個個商場的店舖都千篇一律，好多連鎖店。另一問題是貨品兩極化，一係好貴好名牌的東西，要賺錢交租；一係好平好Mass（大眾化），中間路綫好少。以前的中小型特色舖頭，依家要上樓先搵到，或者你已經是網購一分子，上外國網買衫。

除此之外，租金高企、自由行減少令零售市道放緩，也為網購打開了缺口。

你問吓商戶點解來開網店？因為舖租貴生意又唔好囉！開網店可擴闊銷售渠道，多賺個錢之餘又可拓展年輕市場。點解以前佢地唔會咁諗？嘩你一年搵兩三年錢，淨係數銀紙都唔得閒啦！生意年年有20%增長，我做乜要諗呢啲嘢？

經營網購的成敗關鍵

在茫茫互聯網大海中，他認為人流最重要。

網店始終不是真的又一城，你在附近活動可能每天Physically都要經過，但網店如果Out of your mindset就無運行。

希望鐘意睇我哋劇集的觀眾，每日上來（購物網）一個鐘，或者隔日上來兩個鐘，慢慢養成習慣。

▲ HKTV Mall送貨的紙皮箱設計成禮物盒。

第二個關鍵在於物流要快捷。

如果早上9時前落單，你買的洗頭水、護髮素和出前一丁，會在當晚12點前送去你屋企。

為達此承諾，他於九龍灣租用了一個面積接近2萬平方呎的貨倉作物流中心，統一收貨散貨，並斥資成立了一隊逾200個派貨員及30多部貨車的物流團隊。

▲ 部分派貨員是從速遞公司挖角。

HKTV Mall有什麽品牌？定價如何？

現時，網店逾300個品牌當中，就有約80個為日韓牌子。王維基笑說：

不出幾年我就可以將整個東京帶來香港！

現時，日本品牌衣履在港的售價，通常較東京高五成至八成，但HKTV Mall只會照價加10%。

一件衫東京賣1,000蚊，來到香港最少賣1,500蚊，但依家我只收你1,100蚊，價錢好有競爭力，你唔幫襯我仲幫襯邊個？

▲ HKTV Mall有80個日韓品牌。

如何看待成敗得失？

這真是一條無人行過的路，我真係唔知會點。很多商戶都問我開業初期的turn over會點，好難講，可能我會……一敗塗地。

說到最盡處，他不諱言若果今次再失敗，不排除會有第三次裁員。

做生意就係咁，我唔似得政府工，有些事我自己都不能擔保。

由做香港寬頻日賺200萬元，到現時搞港視日蝕百萬，王維基在經歷種種過後，的確有點改變，他說對某些成敗得失睇化了，開始懂得平常心。但仍堅持的是，生活要有刺激，肯勇於嘗試。

如果你一路都過緊同樣的生活，今日同聽日根本沒分別，18歲同28歲、38歲亦都冇分別，呢個唔係生活，而係浪費人生，所以HKTV開台有句口號，叫做『新活才是生活』。這是我的信念，也是我最想與大家的。

原文刊於《i-Money》369期（收費閲讀）

iMoney facebook：https://www.facebook.com/imoneymagazine  

相關新聞：

【王維基談收視】開台首播有80萬至100萬觀眾