二世祖與富二代的分別

早前阿史睇咗一篇文章，係城中一位名人講二世袓同富二代嘅分別。呢個名人本身係一個有錢仔，老豆大把，但佢就認為二世袓同富二代係有好大分別：富二代呢個身份可以話係佢哋無得揀，因為老豆有錢；而二世袓就係佢哋本身個人嘅生活態度，可以話係個人嘅選擇。

不過响阿史呢類凡人眼中，分別未必咁大。

▲ （相片來源：史檔facebook）

如果講到二世袓，就必然會睇到秦代第二個皇帝胡亥。話說佢爸爸贏政消滅六國，統一天下，建立一個強大嘅帝國，叫自己做始皇帝，即係秦始皇。

佢仲諗自己嘅皇朝可以千秋萬載，所以子孫以後叫二世、三世，四世，一直數落去，二世呢個名就係咁嚟喇。後來，贏政個仔胡亥喺趙高同李斯嘅幫助下，成功响哥哥扶蘇手上搶到個皇帝位，成為秦二世。

不過，呢位秦二世係一個昏君，重用宦官趙高，指鹿為馬，佢本身又荒淫無道。

結果，佢老豆留俾佢嘅江山俾佢敗哂，仲俾人迫死，佢死咗無耐，秦朝就亡咗。於是，大家就鍾意將有啲紈絝子弟叫做二世袓，喻意佢哋同秦二世一樣咁無用。

全文刊於《史檔》facebook，文章經作者授權轉載。標題經TOPick 修改，原題為〈【俗語大解剖】二世袓〉