阿榮：我好想做豬肉佬

我叫阿榮，今年25歲，讀書唔叻，會考剛剛好5科合格，原本在一間小小的物流公司做文員仔，月薪得9,000元。阿媽成日鬧我，話我一事無成，考個車牌做中港司機都叫搵到食，現在做死一個文員仔，日捱夜捱都儲不到老婆本。

今日阿媽又鬧我：

死仔，好心你啦，學返門手藝做返個專業人士啦！靠你做個文員仔得9,000蚊人工，我幾時有新抱茶飲！得閒睇下報紙搵下工啦！

於是我打開報紙，見到我的出路：「肉類分割技術員」！

未聽過？簡單一點來說，就是街市入面的豬肉佬。你千萬不要看低豬肉佬，報道話，現時豬肉佬的日薪已經有900至1,000元，日做10小時，時薪都有90至100元，隨時多過我這個文員仔！

以為豬肉佬係市井之徒？你錯了！有沒有讀過〈庖丁解牛〉？落刀之精準簡直就是一個專業。我今日再讀報紙，自覺要好好向報道中灣仔肉檔的豬肉佬阿朗學習，將一頭豬切成十多個部分只需半小時，哪個部位值錢，哪個部分好食都一清二楚，月賺2.5萬元，養起一頭家。

阿朗雖然周身豬肉味，但有哪個男人工作不出汗？成日說，認真的男人最吸引人，我相信阿琴不會介意吧。

對，我有一個拍拖多年的女朋友阿琴，我們都有拉埋天窗的計劃，奈何欠缺上車首期。希望政府真的會開辦「肉類分割技術員」培訓課程，讀完書都叫做有一門手藝，不用整天被人叫「文員仔」。

雖然日做12小時，可能一個月都只得兩、三天假期，但做街市自由度一定比辦公室高，阿琴想見我都可以到街市揾我呀，然後去鄰近的老麥食個軟雪糕。

儲儲錢，日後應該可以有一個小檔口，與阿琴兩公婆安穩過日子！月入2.5萬，儲幾年錢應該可以夠錢用綠表抽居屋！

好，等我打電話告訴阿琴這個人生大計！

＝＝＝＝＝＝＝＝＝＝＝＝＝＝＝＝＝＝＝＝＝＝＝

我叫阿琴，今年24歲，中環某名牌手袋店的Sales，市道好時底薪連佣金都有2、3萬元。

雖然收入不錯，不過日日企足12小時，有時真的想辭工嫁人算了。

不過，現實並不容許我做少奶奶，因為自己身邊那個不是鑽石王老五，更加不是富二代。

我的男友叫阿榮，現職物流公司文員，月薪9,000元，比我還要低，平時拍拖我地都是食譚仔、麥記同吉野家，但我從沒半點介意。

但今朝，阿榮打電話給我，告訴我他的「人生大計」，我的世界從此崩潰。

電話中，他話自己在報紙見到街市的豬肉佬好渴市，而且收入比文員要高，只要不介意日日做足12個鐘，每月至少可搵2.5萬。

我第一個反應是：豬...豬肉佬？他馬上反駁我話，豬肉佬是專業人士，遲點更可以參加政府的「肉類分割技術員」培訓課程。

打從心底講句，我根本沒法接受自己的男友是個豬肉佬！

每日對住幾斤幾斤豬肉工作，厭惡性高又不討好，即使放工馬上沖涼，不多不少仍是會帶有半點豬肉味。

街市工作環境差，對住班師奶要大大聲嗌「靚姐！靚姐！」，以前哄我、叫我bb豬的溫柔聲線，不就是要消失了？

工作時間長，每日早出晚歸，假期少，大時大節仲要躲在街市斬豬肉，如果想見佢，莫非要我著住對心愛的Tory Burch鞋，去街市等佢咩？

最重要的是，即使我不介意，我個麻煩呀媽一定會有聲出，叫我點同班極品親戚朋友交代？

我將這件事跟了我的好姊妹Elise說，她不停安慰我，叫我「睇開啲」，又叫我去街市行一轉，情況未必是想像中差。

老實講，我已有10年沒去過街市，如非必要都不會去，平時只是會去超市買食物。

愛侶同甘共苦是對，但要淪落到跟豬肉佬一齊，身份、地位、價值觀都從此不一樣，想到這裡，我可以好肯定自己接受不了。

「口裡說不，身體卻很誠實」，我早預左自己會被人話港女，但現實就是如此殘酷。

今日同得我講想做豬肉佬，難保他日阿榮又會變心，話扎鐵人工更高，想轉做職安真漢子。

我不是不愛阿榮，只是，今天的阿榮，明天的豬肉榮，我真是再不懂得如何愛下去。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。