芭蕉扇貼張膠紙更涼更省電

香港夏天愈來愈熱，出街見到好多人手上都有部「芭蕉扇」。「芭蕉扇」其實係一款 USB 充電小型電風扇，售價唔貴。

近日有網民上載一段片上 YouTube，教大家用一片膠紙，去令「芭蕉扇」更大風亦更省電。ezone.hk 記者嘗試用影片中方法改良「芭蕉扇」，睇下係唔係真係有效。

影片有 11 分鐘咁長， ezone.hk 記者嘗試幫大家簡化成文字啦！片主就話呢類小型電風扇製作唔太好，4 塊扇葉重量不一，所以會造成震動。

只要將膠紙貼落最輕的扇葉上，令 4 塊扇葉重量貼近，就可以令風扇更安靜、風力更大、更省電和更耐用。要改良就需要 1 把芭蕉扇、螺絲批同膠紙。

▲ 改良「芭蕉扇」所需工具。

首先拆除芭蕉扇電池，然後鬆咗 4 粒螺絲，打開風扇個蓋。再將一塊約長 2cm 嘅膠紙貼到最輕的扇葉就可以。想搵出最輕嘅扇葉，貼好膠紙後合返好風扇，上返螺絲，打開風扇。如果震動變小，就代表貼啱咗最輕嘅扇葉，可能要試幾次先揾到。

▲ 幫「芭蕉扇」解體。

ezone.hk 記者就 4 塊扇葉都貼上膠紙去實驗。發現風力其實差唔多，用手亦好難感受到震動嘅分別。但將風扇直立在桌上，就會明顯睇到將膠紙貼上其中 3 塊扇葉，開機後風扇都會向後退，只有 1 塊扇葉貼上膠紙後，風扇唔會移動，相信嗰塊就係網民所講嘅最輕嘅扇葉。

但係當記者撕下膠紙再開風扇時，風扇都完全唔會移動，亦感受唔到風力有差別。所以今次實驗結果係，無論有冇貼膠紙，芭蕉扇嘅風力同震動都係冇明顯分別。

▲ 在最輕的扇葉上貼上膠紙。

不過影片中嘅芭蕉扇一打開就好嘈，而記者今次實驗用就比較安靜，可能因為本身震動唔大而睇唔出效果。討論區亦有其他網民表示用膠紙貼 2 塊扇葉效果更好，所以「改良」效果應該會因每部風扇唔同而有差別。

如果你的芭蕉扇本身好嘈又好震，都不妨試下呢個方法。下面就放條完整嘅片俾大家睇下。

原文刊於: ezone.hk