5個貼士教建制派唔會睇漏WhatsApp訊息

立法會昨日（18日）就行政長官產生辦法決議案進行表決，最終政改方案遭否決。多位建制派議員意外離席拒就政改投票，令議案只得 8 票贊成票！民建聯譚耀宗表示，建制派離席係想等劉皇發趕返議會投票，惟最終因溝通有「甩漏」，令議事廳內有足夠法定人數，就政改方案投票。

究竟，譚耀宗議員所指的溝通「甩漏」，係多位建制派議員用 WhatsApp 群組出現問題，還是部分建制派議員無被 add 入 WhatsApp Group 呢？如果閣下唔想重複建制派議員今日的「甩漏」，ezone.hk 決定向大家傳授以下幾個重要貼士！

01：記得開群組通知鈴聲

你手機有幾多個 WhatsApp Group？以 ezone.hk 記者來說，除工作群組，還有很多朋友或者「爸爸會」等群組，大概超過 15 個。不少 WhatsApp 用戶為了免受群組訊息轟炸，一般會關掉將「群組通知」設定為「靜音」，並將「震動」設定為「關閉」。

唔想錯過 WhatsApp 重要訊息，ezone.hk 記者建議大家，先在 WhatsApp 設定中，於「群組通知」→「通知鈴聲」中，設定一個鈴聲，並將「震動」設為「長」。

02：通知畫面「總是彈出」

如果耳朵唔夠靈，又或者在重要會議中選擇了手機的「靜音」模式，ezone.hk 記者建議大家，記得在 WhatsApp 的「群組通知」→「彈出通知畫面」設為「總是顯示彈出窗口」。那麼即使在議事廳中，收到緊急重要訊息要求離場、離席、散水、磨墨、放飯等，都可以在手機屏幕的彈出畫面中看到。

03：買隻智能錶……放飯都知時候

大佬叫「放飯」，你仲呆坐會議室？如果你手機放褲袋，又或放入手袋中，即使你設定通知鈴聲為「開」，又有「震動」，再加「彈出畫面」，你都有機會錯過重要「放飯」訊息！如果係咁，ezone.hk 建議大家，可以選購最新最潮的智能手錶，英文叫 smartwatch，做個醒目人！用 iPhone 的朋友，當然係買 Apple Watch 啦！

提提你，Apple Watch 前天（17日）開始可以 iReserve 買錶，即日預訂即日到門市取貨，正！如果用 Android 手機，就有大量 Android Wear 智能錶俾你選擇。有智能錶戴上手，有乜嘢重要訊息都會彈出於手錶畫面中，唔會甩漏啦！

04：室內開 Wi-Fi 有着數

辦公室或會議廳內，可能都會有 Wi-Fi 熱點俾你上網。你知啦，室內收 3G 或 4G，有時真係唔多順利，就好似 ezone.hk 總部都係咁！如果公司有 Wi-Fi 提供，唔駛問，梗係連上 Wi-Fi 上網，確保連線順利啦！唔知立法會有無 Wi-Fi 呢？

05：唔好靠科技……面對面溝通更好！

科技唔一定幫到手！表決鐘聲得幾分鐘，又要設定，又要拿出手機，有時真係手忙腳亂！ezone.hk 建議大家，如果重要時刻有重要訊息想跟公司同事宣布，唔好用手機喇，既然大家身處同一會議室或辦公室，不如棄手機，直接用口大叫「離席放飯」，或者「離場等休會」，再唔係高呼「散喇」，效果應該會更加好！

全文刊於ezone.hk