情侶拍拖必食：百佳燒味壽司

情侶拍拖最大的難題係咩？冇錢？冇樓？非也，係每日BB豬問：

BB，我哋今晚食咩好？

作為男人，你答咩都死。同BB講「你鍾意啦，你話事！」一定會俾人鬧「冇主見！咩都要我諗，問你食咩你問返我轉頭！」

提議食麥記，BB開始唔出聲，我都心知不妙，再提議「食譚仔三哥？」BB開始發晦氣「你同我出街食飯可唔可以食好啲呀？」

你估我唔知BB想食咩？港女出街例牌都係食日本嘢，餐餐食壽司刺身就最好。但男人又點可以餐餐食凍嘢？當然想食大大碟碟頭飯，又飽肚，又抵食。

再講，同BB豬去食一餐壽司的價錢，夠我食10碟四寶飯連餐飲！

當我以為「今晚食乜呀？」依個世紀難題永遠都解決唔到的時候，百佳旗下的TASTE竟然推出一個本世紀男人一致認同最偉大的食物：25蚊4件燒味壽司！

男士們的救星

以後當BB豬扭計要食壽司，各位男士就有救。你睇！燒鵝壽司、油雞壽司、叉燒壽司，實在太多選擇喇。

當BB豬話：

咪呃人！明明係燒鵝飯、油雞飯、叉燒飯！

男士們唔駛慌！大條道理反問女朋友：

邊有燒味飯得一啖？

男士又可以食到最愛的燒味飯，女士又食到最愛的壽司，男女世紀大紛爭迎刃而解，計我話下屆諾貝爾和平獎超市TASTE 一定有份獲提名！

打敗明將

明將壽司憑紅豆軍艦、啫喱糖壽司衝出國際，連日本網站都有報道，香港人同遊客都衝去「打大佬」，但阿潮絕對不放在眼內！講配搭，今次百佳贏成條街！

▲ 相片來源：高登討論區

燒味的油香慢慢滲入底下的白飯，軟白飯再配上脆皮燒味，雙重的口感衝擊明將！

不過，大家要計準時間，在超級市場姐姐將燒味壽司放入凍櫃前就要把壽司拯救出來。

激發創意

你話燒味壽司太離譜？我話燒味壽司太有創意。作為一個好廚師，正正要掌握不同食材的特質，加上自己的創意創造出驚人的新菜式。

我阿潮睇好依個創造出燒味壽司的廚師，燒味變壽司都諗到，請問幾時會有咸蛋蒸肉餅壽司？菜心炒牛肉壽司？薯仔炆雞壽司？

阿潮真係好期待，打算放工即刻去買一盒試食，想知好唔好食？食完再話你聽！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。