【潮文】職場上有種隊友叫做「豬」

職場上，阿潮從來不怕神級對手，但最怕豬一樣的「隊友」。每逢趕deadline，總會遇到「隊友」來問一大堆神奇問題，考驗你EQ底線。

相信不少人身邊總有一兩位好隊友，以下就是隊友的特徵：

1. email 總愛cc 全世界

隊友們第一個特徵是自作聰明，以為project有佢參與，係全公司福氣，可惜大家背後都叫佢做「低B琼」，點解，因為「低B琼」會拖你落水，成為眾矢之的。

早陣子，阿潮公司有個大project，要同其他team合作，所以大家不停email 公事，點知隊友每次都撰寫一封比訃聞更formal 的電郵，並會將芝麻小事變驚天動地，將其他部門的小小錯無限地無大，還要cc全世界，包括「李老闆」。

為了增加氣氛，隊友會在電郵的重要位置用上紅字黃底，好像潮媽給阿潮的平安符一樣，甚有驅鬼辟邪保平安之用。

結果......阿潮與隊友一同陪葬，隔離組阿頭May姐從此再沒同我say hi了。包大人呀，唔關阿潮事。於是阿潮同隊友講，下次人家有錯，可以私底下「拆掂」，唔需要cc全世界，但隊友會好天真好傻咁問: 「有乜問題? 我做錯? 」

2. 躹躬盡粹

無論上司指點一條怎樣的路，隊友也會躹躬盡粹去完成：

30萬租一個垃圾桶好唔好？好！今年減薪好唔好？好！公司倒閉好唔好？好！

無錯，即使那是死路一條，隊友也會盡力去研究應該跳樓、上吊還是燒炭最好。隊友不但不會質疑上司的建議，更不會理會身邊同事能否同歸於盡，「老細叫我死，我不敢不死」。

3. 點解嘅？

千萬不要以為躹躬盡粹的隊友能夠完成任務，因為隊友的「隊」不是球隊，而是啦啦隊。每當有重任上身，他們定必鑽研一番，然後向你伸出死亡之手：

點解嘅？點解嘅？點解嘅？

阿潮也想問一句：

點解嘅？點解你咁蠢嘅？

沒錯，隊友永遠不明白你在做甚麼，亦不明白要做甚麼，但他們一定會像很專業地質疑：

點解會多一個字？點解多一個字之後又會少一個字？點解要咁多字？點解我條問題會問咗咁多個字？

問下問下，他們就會像啦啦隊般，在一旁看着你完成工作......

4. 拉人落水

雖然隊友平時較個人主義，但在出事時他們也有講求團隊精神的一面。每逢出事時，他們總會不忘推薦其他同事。

上司：「點解出事？」

隊友：「今次呢個proposal，係Sandy有份提議，Cindy有份贊成，Mary有份協助我執行。仲有Donald，佢......當日無番。就係因為佢無番，所以搞成咁。」

5. 多愁善感

其實隊友也有多愁善感的一面，因為他們有時會為了令工作更投入，而把自己代入師奶劇，變成被逼害的慘情主角，日日唱：「誰能及我驚天動地，連流淚都覺嫵媚。」

雖然阿潮不知道返工有何驚天動地，但即使你想當武則天，也不等於其他同事想謀朝篡位吧！

不過其實也要多謝隊友，因為他們會令你在剎那間發現原來自己充滿智慧，就像「鉛製鉛筆」一樣，令不少人發覺原來自己未嘗沒有資格當醫生。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。