教我如何放低攻擊性「胸」器

昨日睇新聞，見到有位女子被判「以胸襲警」罪成，坐3個月15日監，嫻姐同唔少人一樣，睇到嘩嘩聲。

港女的胸部向來被指是「大鑊好平」（當然不是大獲好評），怎麼今次突然被放上「神枱」，升呢做「攻擊性武器」？

嫻姐諗諗吓，如果女人胸部殺傷力很大，那麼港女日日都藏有攻擊性武器出街？過機場安檢會否「嗶嗶聲」響，保安會大叫「有『胸襲』！放低對胸！」？荒天下之大謬。

如果可以放低自己對豆沙包一日，嫻姐絕對唔會介意，但女性的胸部是與生俱來，是需要被尊重，今次判刑「衰在對胸」，嫻姐都諗極唔明，想大叫「媽，好亂啊！」

之後打開facebook，見到呢個「世界級笑話」經已在瘋傳，葉蘊儀更加貼咗張「胸部 x 武器」的大頭相，發起「全城一人一相」行動，反對女性胸部被視為攻擊性武器。

嫻姐第一時間like，這個世上可以攞正牌用胸部做武器的，相信只有《國產凌凌漆》的愛美神飛彈！5萬度的「高熱火焰」一噴出，嫻姐隔著mon都覺得㷫烚烚，勁到可以申請專利。

仲有《家有囍事》的何里玉，雖然佢個「武器」唔識噴火，但都夠晒攻擊性，跟外國勢力的「胸器」始祖麥當娜和Lady Gaga一樣無得輸。

武器講求「分唇」（function）之外，份量愈大，攻擊性亦愈大。其實，真正屬於2015年的最強武器早排經已出現，勁到祖國都要下令全面封胸。

老老實實，嫻姐到這刻仍未見過「武媚娘胸器」的真身，大家隔住塊「小畫家封胸布」，都感覺到武媚娘個份壓迫感，范爺好波！

講到尾，要用到胸部來做「攻擊性武器」，應該排隊排到去新地球，都肯肯定未到我地港女份。

都市嫻情

嫻姐，80後職場師奶，兼職返工，正職做「阿四」，陪皇帝仔吃喝玩樂，最叻計婆仔數，平日嗜好就是捐窿捐罅搵著數，有着數記得預埋我！