莊偉忠：朝十晚四的背後

凌晨三點鐘，夜闌人靜，個個高牀暖枕，發緊春秋大夢嘅時候，一支公，一台電腦，一杯威士忌，或者一杯香濃齋啡，渡過咗好多好多個漫漫長夜。

做嘢去到某個層次，唔使同人鬥忙、鬥技能高低，反而應該鬥得閒，鬥謙虛，鬥眼界高低，鬥胸襟大細，問題係敢唔敢、願唔願請啲叻過自己、勤力過自己、熱情過自己嘅好幫手，然後放手任佢哋攪作，我唔止敢，仲大把喺手，每日做六個鐘頭都嫌太長。

就係因為好得閒，冷靜睇到人哋睇唔到嘅機會，發掘到人哋唔想做、唔識做、唔敢做嘅問題，對內對外創意至可以源源不絕。越早明白呢個簡單道理，事業越早有突破。

一分天才，九分努力，實情係天才好少，自以為天才嘅就好多。當你見到有人輕鬆自如，舉重若輕，朝十晩四，知唔知人哋背後落咗幾多苦功，鑽研咗幾多資料，讀過幾多本書，日思夜想咗幾耐，搏咗幾多次老命，至可以練成少少獨門本領。

十年窗下無人問，醉裡挑燈看劍，未必可以一擧成名天下知，但懶惰，無膽，豬頭炳，心胸狹窄，目光如豆，就講乜都係假。成功靠苦幹，唔係靠父幹。靠父幹，有乜咁馨香。

提醒自己，提醒朋友，唔該些牙(編按: share)。

原文刊於莊偉忠facebook