第一屆港姐究竟係邊個？

新一屆「香港小姐競選」冠軍得主今晚(30日)就會出爐，講起港姐，相信不少人都會認定1973年當選既孫泳恩係歷來第一位港姐冠軍。

不過，其實呢個講法或者又啱唔晒。响無線電視於1973年主辦佢果個號稱「美貌與智慧並重」既「香港小姐競選」前，其實，早於戰後的1946年，已經有大型夜總會舉辦「香港小姐」活動，不過，由於當時既參賽者多數係响夜總會工作既舞小姐或者影片公司演員，所以「香港小姐」呢個頭銜最初就唔係咁「馨香」了。

究竟第一屆「香港小姐」情況係點既樣？我哋可以睇番1946年比賽翌日《成報》既報道：

空軍俱樂部與香中游泳團合辦之中西慈善游泳義賽及選美大會經於昨午在北角麗池游泳場舉行，看客之盛，一時無兩。

 

麗池雖大，亦幾容足無地，預計人數超越五千，足見其盛。港督楊慕琦夫婦、空軍總司令布碌及余兆麒將軍等，均為名譽座上之嘉賓。

由此可見，當時既情況係極其盛大。值得注意既係，當時既「麗池」，仲未變成後來好出名既麗池夜總會。但由於幕後搞手仍是後來的夜總會老板，所以唔少人亦都將兩者等同咗。

至於最後獲得首屆冠軍既係一名叫李蘭既23歲女仔，報道係咁樣形容佢既：

李蘭又名李冰瑩，廿三歲，身高五尺五寸，重一百二十磅，原姓梁，又名冰瑩，現隸凱旋為舞女，戰前為廣州市一中女生，亦曾在潘金龍酒家六樓為女侍，原籍番禺。

 

白光，身高五尺四寸五，重一百五十五磅，十九歲。原姓黃名金群，原是好學生，日人陷港後，因故輟學，下海做舞女時間僅十五天，現隸百樂門。

 

昨天是轟動了整個域多利小城的選舉一九四六年『香港小姐』盛會，這是香港有史以來的第一遭，無怪下午三時前，整個麗池就擠得滿坑滿谷了。

後來，麗池終於變成豪華夜總會，直至1973年夜總會停辦「香港小姐」後，無線電視便於同年舉辦香港小姐競選至今。

原文刊於史檔facebook，獲授權轉載。