學生是世上最幸福？

悠長暑假終於完結，嫻姐早上花了九牛二虎之力才「成功爭取」皇帝仔早起，我一邊催他洗臉穿衣，一邊向他灌輸大道理：「今天又升班啦，要比啲心機學習，如果唔係，以後大個出來工作就會後悔啦！」

誰知皇帝仔睡眼惺忪地回覆我：

媽媽，返學真係好辛苦架，又要默書。又要測驗，又要考試，我真係好想快點畢業，好似爸爸媽媽咁出來做野啊！

我無同皇帝仔爭辯，送他上校車後，急急腳跑去地鐵站趕回公司，在地鐵上瀏覽facebook時突然見到有句說話：

有一種幸福叫返學！

思緒突然間回到小時候，當年天真的我做功課做到忟憎時，都曾經好似皇帝仔咁樣，希望快點長大，快點出來工作，就可以永遠同考試測驗講拜拜，從此甩難，豈料職場才是人間地獄。

皇帝仔返學陰公豬，還是嫻姐返工幸福點？立即做個簡單比較：

1. 時間

皇帝仔返全日制小學，早上8點半開始上課，下午3點半放學，在學校的時間大概是7個鐘，扣除小息時間、食飯時間，實際在課堂坐定定聽書的時間可能只有5個鐘。

嫻姐公司話就話朝9晚6，扣除1個小時食飯時間，名義上是8小時工作制，實際上卻係工時無上限，老細一句說話便要無限OT，間中回到家已經係深夜12點。

某日準時收工，以為老細皇恩浩蕩，你錯了！從你收工到入睡，手機ＷhatsApp群組不斷傳出響聲，始終受到老細遙距控制，真係好想大叫一句：

我要真收工啊！

2. 年假

皇帝仔頂着學生之名，每個星期例放周六、日，公眾假期例必放假，遇上老師發展日、水運會或陸運會，還可享有特別假期，還未計長達90日的寒假、暑假、聖誕長假及復活節長假。

嫻姐都是5天工作制的上班族，但只享有7天的勞工假期，今年因中國人民抗日戰爭勝利70周年紀念日，才額外多了一天特別假期。至於年假，公司肯肯定嚴格遵守《勞工法》指引，工作滿一年7天起跳，再隨年資而遞增，上限是14日。

唔好問我有幾日年假，嫻姐真係唔想暴露自己嘅年齡秘密。

3. 收入

皇帝仔只是小學生，嫻姐早已繳付在學校的午餐費用，按道理，皇帝仔是沒有使錢的地方。可惜皇帝仔間學校有小賣部，他都會叫我比少少零用錢，買吓魚旦、燒賣、飲下維他奶，嫻姐都好識做，都會比少量零用錢他傍身，

做人阿媽真係好傻，辛辛苦苦打份工，都係為咗個皇帝仔過下好日子！

嫻姐為了讓皇帝仔有書讀、有飯吃、有衫着、有屋住，唯有努力在職場上打拼，廣告都有教：「多勞多得！」

事實總是殘酷的，無論你如何努力，每年到了調整薪酬的時候，老細總是愁雲慘霧地講：

今年市場環境惡化，公司的營業額不佳，大家要做好心理準備，與公司共渡難關！

嫻姐在公司打滾多年，每年都聽到老細講同一句說話，真係佢唔厭，我都聽到煩。結果不用問阿貴，每年的調薪幅度，總是跑輸通脹，惟有寄望做Sales的老公跑多點數幫補下。

4. 測驗考試VS報告考試

皇帝仔覺得測驗、默書、考試好辛苦，嫻姐都曾經做過學生，絕對明白皇帝仔討厭返學的心情。

毋庸置疑，現在的小學生真的好辛苦，有些學生的時間表排到密密實實，每日放學後要去補習，晚上做幾份功課做到12點，周末還要上不同類型興趣班，

家長都怕孩子輸在起跑線上，不停催谷學習。真係慘過返工架！

返工又何嘗有幸福可言呢？嫻姐每日返工都不停被老細催促交文件、交報告，從上班到下班做到無停手，有時連洗手間都無時間去，別說吃飯了。假如遇上老細不滿意，還要不停重做再重做，修改再修改，為的只是迎合一男子的喜好。

至於做sales的老公，每日上班的工作就是不停跑數，否則份糧隨時凍過水。最難受的是，每天面對不同的客人，都要笑臉迎人，神情嚴肅少少都隨時被人投訴「黑面」，結果當然是被上司照肺。

嫻姐真是好想同皇帝仔講，返學辛苦，返工都好辛苦，但一定要好好珍惜短暫的校園時光，好好享受做學生的幸福，人生不能重來！

全文刊於都市嫻情facebook，獲授權轉載。