地產代理口中的理想與現實

嫻姐一家三口租住私人樓宇多年，業主每次約滿後都獅子開大口，真係好過去打劫。

嫻姐早前把心一橫，打算轉租為買，呢排頻頻同老公四出睇樓，結果肯肯定就是買唔成樓，除了見識到樓價高企外，還親身體會到地產代理口中的理想與現實。

1. 永遠慢人一步

香港地買二手樓，基本上只能靠地產代理尋找筍盤，不過嫻姐都心知，真正筍盤都唔輪到我。唔知係咪我特別黑仔，每次見到地產代理門口張貼的窮人恩物單位，每次興致勃勃推門入去，

我想問門口那個單位有無鎖匙可以睇樓架？

可是，地產經紀每次總是漫不經心地說：

個單位尋晚賣咗啦！

典解嘅？典解嘅？典解我每次都係慢人一步嘅？

謎底很快就揭開，話說有次嫻姐幾個星期後再路經某間地產舖，窮人恩物的單位廣告牌仍在，想必係D代理太忙，又忘記咗換！

2. 筍盤的定義

窮人恩物被人搶先一步，地產代理例牌着嫻姐同老公坐低，慢慢介紹其他筍盤。

代理：兩位，請問你們budget幾多？想搵D咩類型嘅單位呢？我哋公司好多筍盤架，可以帶兩位去睇下！
 

嫻姐（指住門口）：你們尋晚賣出那個筍盤，價錢同呎數都啱曬我哋心水，仲有無啊！
 

代理：我幫你們睇下先！有
 

嫻姐（雙眼發光）：真係嘅？幾大？幾錢？有無得睇樓？
 

代理：呎數一樣，價錢就係xxx萬元，有鎖匙即睇！
 

嫻姐（不禁疑惑）：點解貴成100萬架？
 

代理：唔同層數啊，尋晚那個單位係1樓單位架！
 

嫻姐（極度無奈）：咁你又話筍盤！

地產代理講得沒錯，1樓與28樓的價錢可以天淵之別，樓價還涉及業主開價、單位裝修等等因素。

不過，嫻姐只係個師奶仔，最叻計婆仔數，心目中嘅筍盤定義，至少要低於市價，即使不低於市價，也不會大幅超出我們嘅預算吧。

3. 說好的海景呢？

每個人對於筍盤嘅定義不一，反正睇樓都唔使錢，靚盤暫時未見到有心儀，但口才好的地產代理就遇到唔少。

話說有次參觀某單位，下午5點仍然熱辣辣，老公開住把芭蕉扇仍然不停滴汗，擺明個單位係西斜，地產代理A如此解說：

呢個單位夠晒光猛，電費都慳翻唔少！

通常跟代理去睇樓，代理都會邊行邊介紹個單位如何，地產代理B說：

等陣我哋睇個單位四四正正，好實用架，啱晒你哋一家三口自住啦！

誰知個單位是鑽石型，更「附送」無敵大窗台，以皇帝仔的身高，用來睡覺都無問題，「四四正正喔…」

最令嫻姐反白眼嘅是地產代理C，大力推介某個屋苑某個樓盤，

單位有海景架，呢個價錢絕對抵買啦！

嫻姐同老公滿心期待去見識下，結果入單位後左望望，右望望都見不到地產代理口中的海景，

嫻姐：又話有海景嘅？
 

代理：有啊，絕對無呃你

代理打開個窗，確實有海景喔，只不過被前方兩棟樓遮住咗，用望遠鏡都睇到少少嘅，絕對無違反商品說明條例。

嫻姐置業的要求好低，只想有個安樂窩，你話我奄尖又好，方丈也罷，始終買樓唔係買棵菜，但地產代理口中的單位始終太理想，與現實太離地吧！