吳彥祖：我不是男神

智慧如醇酒，需時間淬鍊。

已步入「四字頭」階段的吳彥祖（Daniel），是靚佬靚老公靚爸爸，更重要的其內在美，亦隨人生智慧增長，更加了解自己、懂得接受自身的不足。

男神，是虛幻；顧家男，是真實。

真男人，是時間煉成的！

媽媽『走咗』令我學到要珍惜時間。

Daniel 講及去年母親因腸癌病逝的體會：

40 歲嘅我知道時間有限制，廿多歲嘅我唔知時間有限制，成日浪費時間，而家唔會，更珍惜和家人相處嘅每秒每分，因一失去無論幾有錢幾紅幾勤力都買唔番。

20‧30‧40

人生無常，《滾蛋吧！Mr. Tumor》女主角熊頓（白百何飾）在邁向 30 歲、對人生充滿憧憬時，卻發現患上非何杰金氏淋巴瘤，Daniel 飾演為她主診的梁醫生。

回望當年踏入 30 歲時，Daniel 也是躇躊滿志。

廿歲階段係有 energy，總係想快啲成長、想拍多啲好戲、好多嘢都想試、覺得自己咩都可以做到，但太後生唔夠知識去面對，有好多嘢驚。入行時咩都唔識，唔識廣東話、唔識演戲，有好多嘢唔知點去面對。通過幾年經驗，慢慢成熟咗，就唔驚喇，30 歲係 transition period。

《旺角黑夜》、《新警察故事》、《三岔口》等都是他 29 歲至 30 歲時的作品，此後還有《門徒》、《竊聽風雲》系列。剛剛41 歲生日的 Daniel，人生向另一個十年前進。

一到 30 歲係成熟嘅轉變，知識與 energy 都可以合一，有經驗去做好多嘢。當中有錯有啱，如開經理人公司，當初出發點本來係好，係想幫朋友，當 40 歲時就知自己強項不在這裏，能力同時間都唔夠，於是結束，要 accept 自己唔係咁理想的部分。

人愈成熟愈追求簡約

他以前一年平均參演 3、4 齣電影，現決定每年最多只演 1 至 2 套，其餘時間都會完全給予家庭。

廿幾歲時好自私，就係想玩；30 幾歲時想要家庭，便慢慢向呢個方向行，結婚生小朋友後就更加諗通。而家最大目標係屋企，諗阿女嘅未來，唔係諗自己，佢係最大㗎喇，已經係 selfless 階段，自己唔係排第一。」、

「所以點解冇經理人公司，因為以前想做嘅嘢都變咗，就減咗佢唔要。」Daniel 說：

而家目標唔係想仲要幾紅先滿足，而係對演戲嘅要求。後生時想快啲有多啲機會，而家知道係要等，如兩三年前可能唔會接演《滾蛋吧！Mr. Tumor》，因當時未必理解梁醫生心態，只能扮出嚟。我希望以後嘅角色都係用真感受而唔係扮演，呢個係現階段嘅自己對 acting 嘅要求。

人生，原是一場遞減法。能捨，可得更多。

現在係 minimal 階段，想要嘅嘢愈來愈少，啱啱搬屋掉咗好多嘢，因為唔需要那些物質去令我開心、令我覺得成功，一切在心裏面已經可以畀到滿足感。去美國參演《Into the Badlands》，最開心係終於有唐人可以做電視劇主角，呢個滿足感係買唔到，亦唔係可預料得到，珍惜呢啲 surprise 多過物質得着。

青春時求快求多，人生的細緻淡雅之美，卻須成熟了才懂欣賞。

拍戲如睇心理醫生

Daniel 出名孝順，去年得悉在三藩市生活的母親癌病復發，即暫別影圈，與妻女赴美伴母，無奈吳母終不敵癌魔。喪親之痛未及半年，Daniel 便接到《滾蛋吧！Mr. Tumor》劇本。

那時仲係好唔開心，冇打算咁早復工，已推咗好多劇本，點知呢個嚟咗，睇到梁醫生嘅經歷同自己幾似，心諗：『係唔係個天安排？』覺得呢個戲嘅 message 好，值得放下情緒去接演。

好心有好報，今次演出意外地成為 Daniel 一場心靈自療。

照顧媽咪時，情況每秒每分都在變，冇空間畀自己去理解成件事，情緒 down 到唔識點跳返出嚟。拍攝時，勾起好多唔開心嘅回憶，但逼我再面對一直唔識點 handle 嘅事，就如睇完一次心理醫生，將情緒抒發出嚟。

我不是男神

Daniel 多年來在兩岸三地都是公認的男神，「呢個唔係我嚟！」他對此封號有感而發：

為呢套片於大陸做訪問時，有人話我今次個角色好老、好頹廢，我話啱吖，個醫生就係咁，令人有呢個感覺係好事。其實我好憎演白馬王子角色，因為係唔現實，呢個世界係冇人完美。而家接戲係諗個角色有冇意思，而唔係拍得我型唔型。除了外表，『吳彥祖』仲可以畀咩嘢給觀眾？所以一直堅持寫 Instagram，希望話畀人知我睇到嘅世界係咩。

改編插畫師熊頓經歷

《滾蛋吧！Mr. Tumor》改編自內地 80 後漫畫家及插畫師熊頓的真人真事，她於 2011 年發現患上非何杰金氏淋巴瘤，但一直抱有樂觀態度面對逆境，於 2012 年 2 月起以自己的抗病經歷畫成幽默的《滾蛋吧腫瘤君：我與癌症鬥爭的一年裏》，並於網上連載，點擊率高達 300 萬人次；可惜始終不敵病魔，在同年 11 月逝世。她其他作品包括《熟女單身日記》、《減肥俠》、《熟女「房」事心經》、《熟女戀愛事件簿》等。

全文刊於《經濟日報》（收費閲讀）