有一種朋友叫齊昕

近日「齊昕摑母」成了網絡花生，在西洋鬼節突掌摑母親，有人撐齊昕亦有人讚母親，花生不絕。

阿潮只想引用齊昕早前對劉進圖事件的留言說：

One sees the tip of the iceberg and comes to all sort of conclusions.

 

(有人看見冰山一角便妄下定論。)

相信大家不是CY家族心裏面條蟲，人家母女如何相處實在無從得知(雖然齊昕早已大爆被母親掌摑)。各位法官大人，今次好難審啊！

不過，阿潮由衷地相信龍蝦，啊唔係，梁太話齊昕是「善良嘅細路女」。因為齊昕絕對是義氣仔女，如果你有一個齊昕般的朋友，恭喜晒！

1. Friend 到無求膽自大

齊昕義字當頭的程度直逼關二哥。試問有誰被記者圍位時仍奮不顧身遮住朋友？齊昕一句：「唔好影我朋友！」

此句一出，簡直就好像《XX豪情》中主角飛身為友擋子彈般震撼！正所謂「Friend 到無求膽自大」，有這種朋友，簡直是此生無憾。

試問在「情與義值一蚊」的今天，有多少朋友可以為你「上刀山落油鑊」？連替你飲杯鉛水都叫屈辱啦！

2. 好玩得

大家看西洋鬼節當天看過齊昕令人驚豔的造型，或許會更認同「化妝靚過真人」的定律。但齊昕出名「玩得」，又何止化妝？

如果你被問候家父何時仙遊，相信不懂占卜的大家只好問候對方回禮。但幽默感十足的齊昕卻不忘諷刺開玩笑，直言：「I love this guy. Too funny hahaaa」

可惜死亡問題始終較嚴肅，齊昕又不是多啦X夢，無法為大家實現願望，令她的幽默沒有人欣賞。

不過齊昕對批評一向豁達，你說她是「廢青」？她就填M記申請表給你看，相信她成功靠苦幹的話，一定能超越劉鳴煒，月儲三千定能上車！

3. 擇友唔理你住「邊L度」

齊昕貴為特首女兒，擇友標準卻很平民。她去年接受有線電視娛樂新聞專訪時大爆，自己曾多次與父母吵架，最嬲父母judge自己的朋友，更大爆梁特首及夫人很注重她朋友的外表，家境、讀書成績等，但她就認為判斷一個朋友好定壞，應該是視乎對方的人品。

她更在訪問中大談要成為其知心好友的條件，原來很簡單，

Loyalty（忠誠）同Trust（信任）最緊要，要信得過，同埋真心為我好，佢可能做咗件事出嚟，效果未必對我好，但係出發點係好。

不計較朋友住「邊L度」、不計較朋友貧或富，不計較朋友是廢青定精英，阿潮真心真意覺得，齊昕就像淤泥中的蓮花、塵世間的奇葩，值得深交。

阿潮在此向齊昕作出呼籲，雖然我是「五無人士」，無車無樓無錢無學歷無美貌，但阿潮不會像「傳奇」大狀馬恩國教你孝道，我們可以做朋友啊！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。