藍橘子：每個大人都曾是小孩

最近非常流行一張合照，六個人手扣住手，擺出一顆六芒星形狀，個樣仲要超有夢想。第一次睇到，我就覺得呢個合照方式簡直係為我而設！於是，我立即Send幅圖去朋友Group！
 

我好想要六芒星啊！幾時影返張？

起初大家都好熱烈咁討論，究竟邊個應該企咩位？每隔一陣我都會問

咁即係幾時影啫？

但佢哋都無回應我…

原來佢哋以為我只係想開心Share。當我話「其實我認真想影一幅…」，佢哋態度就180度轉變…
 

你講真㗎？咁白痴，畀公司同事見到點算。朋友A咁講。

「我老婆見到會同我離婚。」朋友B拿老婆做擋箭牌。

「我仲洗見人嘅？」朋友C突然顧及形象。

「朋友D已閱讀」朋友D一向已讀不回。

「其實我都係講吓笑啫，我而家假假地都係一個寫故佬，仲要靠塊面口搵食。」我回應打圓場。

但其實，我心入面覺得好失望，到底我以前班弱智無極限嘅痴線朋友去晒邊？以前就算同屋企人嘈交，離家出走每個朋友屋企輪流住幾日，直頭仲開心過留喺屋企。

▲ 相片來源：iStock

而家莫講話通宵，好多身邊朋友頭像都轉晒結婚相甚至家庭合照，就算想話約出黎食餐飯都難。

最記得一次喺學校，成班痴線朋友做事根本唔會思前顧後。朋友A竟然話自己因為驚鬼，所以未睇過回魂夜，於是我哋第日就決定Lunch偷偷哋潛入禮堂，用投影機播周星馳《回魂夜》。

最後訓導主任聽到禮堂有聲被人捉到正一正，星爺喺呢個時候大叫：「定啲黎！大家當無事發生，我哋女照溝、舞照跳！」連訓導主任都呆一呆忍唔住笑，最後當然畀人罰到阿媽都唔認得，呢件事我哋每次食飯都會講返起。

朋友B覺得用濕紙巾扔上課室天花板已經唔夠興奮，所以用珍珠奶茶嘅珍珠，直接用飲管吸入口，再射上風扇，睇吓邊個唔好彩。

《小王子》入面有句說話：

每個大人都曾是小孩。

但當年紀越大，越覺得自己已經成長，覺得某啲事已經唔再應該做。
大家都已經成長到一個弱智唔起嘅年紀…

我唯有自己做…
我由衷希望自己，可以有弱智一世。

全文刊於藍橘子 x 萬用上帝的facebook，獲授權轉載。

標題經TOPick 編輯修改，原題為〈大家都已經成長到一個弱智唔起嘅年紀…〉