張晨：為甚麼有些人搭小巴總要坐「出面位」？

無論係小巴定巴士，你都會見到一種人，鍾意坐「出面」嘅人。

一個橫排座位有兩個位，唔係「出面」就係「入面」(即窗口位)，正常呢個係消費者選擇，冇咩好講。

但有啲情況，你覺得佢哋之所以揀坐「出面」，係有啲計算，並非純粹個人喜好。

假設車費係HK$3.5，人係好貪心嘅，你畀HK$3.5，但就想拎走HK$7嘅嘢。
你既然冇時間坐足兩次賴死唔走，
就唯有一個人享受兩個座位。感覺上自己就賺咗。

的確，每個人一坐低，心裡面都想「最好唔好有人坐落嚟」，等自己可以獨霸兩個位直到落車。

諗法自私但現實。

可惜，當人愈來愈多，空嘅「橫排座位」愈來愈少，終於去到一刻所有二人座位都有一個人。

我哋稱呢種現象叫「All in單」！意味下個乘客必需要「搭枱」，即係有人唔可以再獨享兩個座位。

面對呢種情況，有人就會由「坐入面」變「坐出面」。

為咩？好簡單！用身體擋住你，增加進入嘅難度，令你另覓座位，唔好阻住阿叔同個空位二人世界！

有啲卑鄙但萬試萬靈。

朋友阿強亦試過因為人哋「坐出面」而難堪，件事發生喺小巴上面，架車得返一個位，而嗰個位喺「入面」。

大家都知，小巴司機並唔會理你安全，上咗車佢就開車。阿強嘅身驅面對80Km嘅高速已經搖擺不定！

但坐出面嗰位阿嬸繼續坐「出面」，冇諗過坐入去，冇諗過畀阿強易啲坐低。

阿強大份阿嬸又大份，情非得已唯有用個「屎忽」慢慢攝入去，阿嬸即時西口西面，百般不耐煩，阿強差啲以為佢係老闆，呢程車係佢請客。

但事實上大家都係畀HK$3.5。

阿強安慰自己：「佢一定係好快落車，所以唔坐入去，免得一陣落車畀個「屎忽」我嘆！一定係咁！」

不過車一路行，站一路過，阿嬸毫無落車意慾，距離阿強個車站愈近，腎上腺素立時急升，最後阿強仲早過佢落。

天呀，佢心諗自己做錯咩事？

又要講聲「唔好意思。」

阿嬸做下樣縮一縮，但依然係得10Cm左右嘅空位畀阿強通過。

「屎忽」再次出場，慢慢攝出去，中間聽住阿嬸細細聲咁「妖」咗幾下，真係想兜腳西落去！

件事真係同「圍城」差唔多，

想入去入唔到，想出嚟又出唔到。

所以，有時我都想問：「點解你哋咁鍾意坐出面？」

如果真係喜好問題咁就冇計，但若然係想自己坐晒兩個位嘅話，麻煩你畀Double錢，大家Fair啲。

原文刊於張晨（鳥不起）facebook，獲作者授權轉載。

標題經TOPick 編輯修改，原題為〈有冇諗過點解，明明有兩個空位，但啲人會坐「出面」而唔坐「窗口位」？〉。