藍橘子：有無辦法可以阻止女朋友買衫？

「等我幫你打造一個Oppa 造型啦！」女朋友除咗自己去買衫，仲好鍾意幫我買衫。佢知道我買衫好求其，但佢絕對唔容許我著得求其，所以每次去親韓國日本，我衣櫃就會多咗一堆新衫，有時連我自己買咗呢件衫都唔記得，相反佢就記得好清楚。

「點解你唔著黑色嗰件褸？」

「黑色？」

「喺日本買，黑色！胸口有幾個袋嗰件呢。」

「幾個袋…？」

「上次我幫你買嗰件啊！」

「……」Sorry，我完全無印象…

基本上入到服裝店，我就好似個試衫公仔咁，佢就不斷將唔同嘅衫褲拼落我個身度。「唔好試咁多件啦，呢件望落都知唔靚。」我真係好懶換衫，又除又著咁…

「試衫又唔洗錢嘅！」

「但要時間嘛…」

「得啦！總之你入去逐件試畀我睇～」

▲ 相片來源：iStock

為免女朋友變母夜叉，我只好無奈奈咁行入試身室。佢好鍾意喺出面等我，所以我每試完一件都要開門畀佢過目。試衫都還好，試褲真係好消耗體力，唔著鞋又睇唔到褲腳襯唔襯，於是又著鞋又除鞋又除褲又著褲…試三條已經喘晒氣。

最後呢？都係買返第一次睇啱嗰條…

而女朋友自己買衫，情況都係差不多。流血就在所難免，只能夠堅守住最後防線，盡量減輕傷亡。

「喂妳呢件屋企咪有囉…」

「唔同㗎！唔同色㗎！呢件係淺淺哋嘅粉紅啊！」

「淺淺哋嘅粉紅妳都有件囉！」

「呢件質料唔同㗎！」

「冷衫妳都有好幾件啦！」

「呢隻個針織完全唔同囉～我想買黎著畀你睇啊，用心良苦～」

「妳真係偉大，妳上一世係咪觀世音菩薩…」

到底女仔對衫褲嘅辨識程度可以去到幾精密？！

女朋友無答我，好開心咁飄咗去試衫，但一個男人企喺試身室門外實在太變態，所以佢會試完一件衫影幅相即刻SEND畀我，我喺舖頭外面觀賞。不過呢，其實就算我畀乜意見，結局都係一樣…

「件衫幾靚吖！」

「好啦咁我買啦！」

「我覺得唔襯妳。」

「我先唔會聽你講，不知幾靚！」

「無論件衫點靚，都唔夠妳咁靚…」

「我知，但我就係要買！」

就算我唔出聲都好。

我見你唔出聲，所以我買咗啦～

無錯，結果都係一樣…

原文刊於藍橘子facebook，獲授權轉載。