張晨：這時代怪獸很多…

世界對唔同人都存在好多恐嚇……呢排聽到件事令我覺得呢個時代，怪獸實在太多。有個朋友係教細路仔彈琴，有次見到佢望一望WhatsApp之後，眉頭深鎖。原來係一個家長Send條片畀佢，問個仔今次係咪彈得好咗。

我覺得你為人師表，雖然唔係教書時間，但睇下學生表現都正常啫，個樣唔使咁難受呀？

佢冇理我，WhatsApp講咗幾句評語，十分鐘之後佢又收到一條新片。我朋友冇再理，過幾個字就收到電話，係個家長打嚟……

佢好聲好氣同嗰位家長講「其實唔使咁急嘅，你仔仔表現好好架啦」之類。

再20分鐘，又有一條新片Send畀佢……

朋友同我哋呻，覺得睇片唔係問題，個細路不斷喺屋企被逼喪練先至陰公。佢話呢個家長算最極端同癲，其他家長正常啲，但都有少少過份緊張。

今時今日，部份家長嘅教育方針就係高度壓逼、精英主義，仲要係數字上嘅精英主義。用證書去衡量得失、分數定成敗。當然做成呢啲觀念，我哋嘅教育局「應記一功」。

最慘係呢種「壓逼」係會傳染，就算你本身係正常家長，見到隔離阿明仔日日學90樣嘢、去幾間補習學校，個心都會慌。突然覺得「自己個仔好似太得閒」，慢慢思想「不如都畀佢學啲嘢」，之後漸漸成魔。

你之所以有咁嘅想法迴路，因為你深知個社會Buy呢套。你好明多幾張證書真係威啲、咩多元發展根本就係空談、去到最後都係睇Cert睇數字。

我細細個曾經對住個三角型，問咗老師一個問題：「點解我哋要咁辛苦去計個面積？」結果係畀佢罰企。

大個諗返先知自己當時冇錯，只係佢唔識答。其實佢可以解釋畀我聽喺現實世界點應用，但佢冇，因為佢根本唔知。佢從來冇思考過「點解要教」、只係知「點拎分數」。

一個錯嘅概念，影響晒家長、教師甚至學生。所以講到尾，都係「你」嘅錯，冇錯又係「你」，政府嘅一班廢官。

怪獸好多，但怪獸嘅變異元素，只有一個。

原文刊於張晨（鳥不起）facebook，獲作者授權轉載。