張晨：人大了就不會再想窮食放題

我十幾歲嗰時，成班朋友每隔幾個月，就會搞一次「豪食團」。講落好巴閉，感覺會好豐富，但其實只係一餐每人200蚊落到樓嘅「放題」。

收200蚊就畀你任飲任食，食物質素自然都控制喺「正常」水平。所謂「正常」，即係有啲味道，未至於入唔到口，但唔會令你Chok一個飲食節目嘅誇張好食樣出嚟。

呢種質素同大部份人嘅人生格言差唔多，都係「不求有功，但求無過。」

但沒關係，嗰時我哋儲好錢，一坐底，已經進入戰鬥狀態，仲附帶一種對抗心態！對抗啲咩？對抗「放題」囉。

好得意，你畀低200蚊任食，個心就想食超過200蚊價值。

冇錯，你想食窮間放題。雖然呢個意念除咗令你畀錢爽啲之外，別無用處。但年輕就是充斥一點戇。

所以我哋食得快，仲食得狠！為咗令個胃有足夠嘅戰鬥空間，我哋甚至頒佈一條「放題不得剔壽司」嘅終極命令！緊係啦！壽咩司啫！一嚟就刺身啦！

即使已經好飽，即使去到極限，我哋仍然追求突破，夾硬塞落個口度，將享受化成痛苦，先肯收手。

喺嗰個年紀，提起任食，大家都會豁條命出去。

直至近年，一班朋友再次去呢種200蚊放題，席間竟然有人喺「壽司」一欄劃上剔號。眼前唔對路，我即時制止：「喂，係都剔刺身啦。壽司會好快飽！」

佢呆一呆，之後笑一笑：「飽咪停手囉，仲細咩？」

一句「仲細咩」挑動起我嘅神經，睇嚟佢已經忘記咗以前喺放題戰場上，大家都曾經拋過浪頭，灑過鼓油。

佢已經離地了！

正當我想嚟一場激烈舌戰之際，佢繼續講多幾句：

細細個就搏命食啫，而家你都應該清楚，食得太多，受苦嘅咪又係自己。飽得濟消化唔到又辛苦，食錯嘢胃腸又發炎。以前為200蚊搏命，係因為要畀200蚊真係攞你命呀嘛。家陣你老哥返一日工都唔止呢個數啦。既然係咁，啱啱好咪算，何必逼自己跟住以前嘅玩法，貼錢買難受？

聽完佢講之後，再望下個肚腩仔，我似乎都感覺到大家的確唔再細個。

原來有啲嘢已經唔使咁執著，我哋早就走過咗「執著期」，依然執著，只係你冇放過自己。

之後，無論自助餐定放題，我仲係會食多少少，但Feel到真係飽就會停手，留下一句「多謝款待」就走。

諗返轉頭，無論當年點樣喪食，我哋都冇成功食窮過間放題。

根本幾執著都好，我哋一次都冇贏過。

 原文刊於張晨（鳥不起）facebook，獲作者授權轉載。標題經編輯修改，原題為「當你覺得「就算係放題，都唔使食太飽啫」嘅時候」