1.48枝水真係唔夠兩支水

嫻姐昨晚在廚房洗碗，突然聽到老公不斷喪笑，好奇下就走出大廳，誰知見到老公笑到攤在沙發上，簡直可以用笑到斷氣來形容。

有咩好笑啊？

老公笑到出唔到聲，遞部電話過來示意我自己睇，我接過部電話，只看文字，無甚特別，大意是有公司想在船上開派對，於是向船家落單購買飲料。

打開錄音，真是笑到我叫救命！原來船家睇錯了訂單，照單全讀：

有D數字我唔係好明，淨係睇頭內文已經唔明啦， 1.48 支水，即係兩支也不夠? 2.36罐，係咪可樂黎架?不過英文我又唔識，小數點後面個D又係點計呢？

第二段錄音，船家突然開竅，知道自己搞錯了。

依家我明啦，原來12345678個度，是第一項、第二項、第三項個D黎嘅，48枝水，330ml黎嘅；36罐，可能是可樂啦，我明白啦依家！

第三段錄音，再次令我笑到叫救命，船家知道1.48枝水成為全城熱話後，自稱要被兒子捉去看精神科醫生。

王小姐，好大鑊啊依家搞到，全城都講緊呢個話題啊，1.48，2.36，大鑊啦，依家我個仔要帶我去睇精神科!

我同老公聼一次笑一次，剛沖完涼出來的皇帝仔，見到我們兩個喪笑，又問「爹哋媽咪，你們笑咩啊？」於是我將部電話遞給阿仔，叫他自己睇。

阿仔接過電話，用充滿抑揚頓挫的朗誦腔大聲朗讀：

1點48枝330ml 水，逗號，330m-l枝水，2.36罐正常紅色可口可樂，24盒l-e-m-o-n-t-e-a……

他一本正經讀完後，再聼埋第一段錄音，然後講：

「都唔知有幾好笑，叔叔計得好啱，1.48枝水，真係唔夠兩支啊！」

我聼完阿仔的說話後突然陷入沉思，覺得笑錯了船家，未必人人都識辦公室會議記錄那些複雜的「5.1.1」！

以下錄音：

都市嫻情

嫻姐，80後職場師奶，兼職返工，正職做「阿四」，陪皇帝仔吃喝玩樂，最叻計婆仔數，平日嗜好就是捐窿捐罅搵著數，有着數記得預埋我！