HR面試奇遇記「我要正本呀！」

尋日約左個candidate上嚟見工，佢將「唔帶正本文件」呢份堅持發揮到極致...

「麻煩你俾啲cert同工作證明嘅正本我丫」

佢係袋入面拎左部ipad出嚟篤左兩下，然後指住個mon

「係晒呢度！你俾個email我，send俾你啦。」

「先生....我地要正...」

「呀！請問你地wifi password係咩？」
-------------------------------------------------

話說依家咁多鎖碎嘅HR工作中，其中最重要嘅一樣就係約candidate interview喇！梗係啦！啲line manager好似催命符咁，一早返到公司都未打開check尋晚唔知邊個部門呀頭凌晨send嚟個email，就開始打嚟問「呀薯蓉，幫我約左interview未呀？」

「我部門小左一個人呀！就嚟死人喇！」呀係咩？但我尋日見到你部門啲人鼠左去食tea bor！死前最後的tea time嗎？

講開約interview 基本上都係會提candidate帶cert呀工作證明正本嘅~~點解要睇正本？

好簡單！我點知你會唔會係啲copy到做手腳呀！雖然依家好興係強國度整張假cert，但made in china嘅質素點會好？一眼就睇穿你啦！

可惜嘅係人類總係犯同樣嘅錯......今日又約左個candidate嚟見工。

薯蓉仔：「先生，麻煩你俾啲cert同工作證明正本我丫 ！唔該！」

著校服扮suit嘅先生係佢嘅紙袋度搵緊啲cert ，結果佢拎左堆copy俾我。

薯蓉仔：「唔好意思呀先生，麻煩你俾一比正本我丫！」

校服先生：「我冇帶呀！」

薯蓉仔：「我係電話度應該有提你帶正本家喎」

校服先生：「我記得呀！」

記得咁你做咩唔帶呀？(為左維持我薯蓉仔嘅形象，呢句我吞左唔講)

校服先生繼續講：「但我唔記得拎嚟呀！睇住副本先啦！」

奉勸大家，呢啲危險動作千祈唔好學！

呢個時候另一個人類又出現，短裙小姐終於有乖乖帶哂d cert正本俾我地checking。

薯蓉仔：「小姐，請問你u grad張cert點解得copy嘅，有冇帶正本過嚟呀？」

短裙小姐：「我u grad張cert唔係A4 size㗎，又重又大張，拎得好唔方便~所以就冇帶喇！」

下......讀咁多年書都係為左依張沙紙，依家係咪諗住墊煲底先？強烈要求各大院校整張A4 size cert俾各大畢業生！

相信做開HR嘅都會明白以上嘅辛酸。其實我地HR薯蓉仔唔係想麻煩各大求職者，我地都係按本子辦事。

睇cert同工作證明都係方便我地check番你地嘅past experience。睇正本都係為左防止有虛假文件出現啫~大家多多關照丫唔該！

原文刊於HR小薯蓉，獲授權轉載。標題經TOPick 修改，原題為〈見工奇行種系列之「我要正本呀唔該!」〉