張晨：致一眾「新一年我一定要點點點」嘅人

好，仲有幾日，2015就會離我哋而去。好多人喺呢段時間都會士氣高漲，昂首闊步，向天大叫一聲：

好！2016年開始！我一定要『咩咩咩、點點點』！！

「咩咩咩」可能係「返工唔遲到」、「每日2AM前瞓」。「點點點」可能係「一星期跑3次步」、「每月儲幾千蚊」。

對於呢種咁激動人心嘅「奮鬥宣言」，我只想講一句：

算吧啦，六師弟，做咩啫你？

你諗真啲，其實呢句「新一年我會努力」背後嘅真正目的，就係「今年畀我Hea埋佢啦」。

係咁殘酷架，你要努力的話咪而家努力囉，做咩要「下年努力」啫，你估你出糧畀自己？齊頭數易計啲呀？

只係當你誓神劈願咁話「下年努力」之後，就可以大無私樣，毫無罪惡感地Hea埋12月28、29、30同31號呀嘛！

你只係送咗一個充滿光環嘅藉口畀自己。

聽日要返工，不如早少少返去Prepare？

唔會啦，下年先啦，都未下年。

有份Report老闆想要，而家整埋畀佢？

唔整住啦，下年先啦，我下年會發力架啦。

冇錯，呢幾日你咩都唔會做，因為你應承咗自己「下年先做」。所謂「下年努力」，就係攞正牌「今年唔努力」。

而呢個「下年做」係有演化嘅。分別係「下個月做」、「下個星期做」同「聽朝做」。

明明話「下年做」嘅目標喺1月1號你唔做，會同自己講「差一日啫，聽朝開始！」然後「聽朝」當然係開始唔到啦，之後你會諗「頭一星期當唞下，下星期做！」

歷史繼續重覆，成個禮拜都Hea過咗，所以你有個新Idea：

第一個月當適應，下個月開佢波！好認真。

無錯！你果然認真，認真地逃避。終於等到6月，雖然只係「過咗半年」，但你心中覺得「得返半年」，即刻出必殺招：

都過咗半年，不如下年重新開始啦！今年當觀望，休息是為了走更長的路！

成個過程精彩絕倫，你唞、你Hea、你適應、你觀望、你休息，總之你死都唔做。

講真，其實你自己好清楚，有幾多次「聽朝起身做」真係起到身？

所以，與其有時間喺度幻想下年點發奮，不如認真利用剩返呢幾日，去追返2015年浪費咗嘅時間。

Ps. 呢篇嘢最想搖醒一個人，嗰個人就係我自己……

原文刊於張晨（鳥不起）facebook，獲作者授權轉載。