莎比亞：同女朋友行街不能說的3句話

同女朋友行街Shopping，絕對是一門藝術，稍稍表現得不耐煩，後果不堪設想⋯⋯

我享受跟她逛街，但唯獨一走到那些化妝品櫃檯或貨架，就會周身唔自在，身體機能甚至會突然出現一個異常反應－－好眼瞓。

一行近，就眼瞓；一走開，就精神。

但當女友在苦惱選購護膚品時，有些說話，無論你嗰刻幾想走都好，都絕不能衝口而出。我就是失敗的例子。

1. 你不能說：

喂，走得未呀⋯⋯而家有幾百樣嘢揀咩？半個鐘都未買到？

因為她會說：要睇清楚先買㗎！一陣買錯嘢，搞到敏感點算呀！你悶咪自己走先囉⋯⋯

2. 你不能說：

又買？成日都買咁多嘢，你係咪用得晒㗎，嘥錢！

因為她會說：我次次都格好晒價，等到有得平先買咋！女人要保養係要搽咁多嘢㗎啦，一陣殘咗啲啲，又畀你嫌我醜樣呀，走去識第二個呀⋯⋯

3. 你不能說⋯⋯對，其實最好甚麼都不要說，就安靜地待在她身邊，得閒就講句：

唔錯唔錯！幾好幾好！買啦買啦！

，即使忍不住打喊露也不要緊，因為過後她會明白你付上了無限耐性，然後笑著跟你說：

好啦，你想睇咩呀？到我陪返你喇！

有一次我跟女友坦言：

其實我對妳睇緊嘅嘢咩都唔識，做乜仲成日叫我陪妳睇？

或許因為男人都是慣性一個人速戰速決，不明白她原來這樣想：

「我鍾意你陪我睇我鍾意睇嘅嘢，係咪好複雜咁？我唔知呀，總之就好開心！」

後來，當我想通了一個道理，便乖乖哋陪著她，幾耐都頂硬上，那就是——當她說過願意陪我捱苦，幾困難都在我身邊支持我時，而家只係陪佢買啲嘢啫⋯⋯唔係咁都捱唔住嘛？你得嘅，撐住唔好瞓呀！

不過，溫馨提示，角色掉轉時，如果佢陪你睇Game、睇模型⋯⋯總之嗰堆充滿「男人嘅浪漫」嘅嘢，佢一打喊露，就要即刻走！

大概天下間嘅男人同女朋友行街，最開心永遠都係聽到呢句：

喂，買完喇，走得喇！

原文刊於莎比亞facebook，獲作者授權轉載，標題經由TOPick 擬定。