教我如何不叫梁特首

「梁特首」又洗板啦！原來上個月龍蝦第一夫人跟頌昕準備飛去美國時，遺留行李在機場禁區，雖有急Call CY 施壓要職員幫手拿行李。

非常夠Guts 的職員一接電話：

梁生，你好！

對面卻傳來：

叫我梁特首

如果你覺得這有如「我爸是李剛」，少年你太年輕了，其實「三條跑道好過兩條跑道」，「梁特首」三個字當然好過「梁生」或「CY」兩個字啦！

為了政治正確，大家到底應該在甚麼時候叫梁特首？阿潮不直接答你，用例子，即是《阿梁的故事》答你：

1. 阿梁下海

阿梁是一個鮮明出眾嘅方丈豬肉佬，終於等到一個機會......

文西：

阿梁，國家終於有任務比你！

阿梁搖一搖手中嘅Dry Martini，說：

你都係叫番我全名：梁特首！

阿梁~

叫我梁特首！

阿梁講咗一輪，決定用自己方式接受國家任務。

2. 邂逅龍蝦

在接受任務期間，阿梁帶同愛犬到西九文化區海濱長廊散步，正偷偷地不執拾愛犬的便便：

便便如僭建，處理咗就唔存在。

突然阿梁見到一生中最愛—小龍女龍蝦。

龍姑娘見到阿梁，問他姓甚名誰。阿梁不其然chok了一下：

叫我Leung，Tat Sau。Leung Tat Sau。

姑娘你係......我知！

龍姑娘含羞答答地回答：

係咩？

Dead air 咗一輪，龍蝦抽咗一口梁氣回答：

我叫龍蝦，無電視時係日頭，做成龍時係夜晚，平日鍾意喺屋企種菜......

阿梁此時忍不住大唱《喜歡你》，二人一拍即合，組織幸福的「愛生事家庭」。

3. 為愛妻出頭

阿梁為了令體育界有經濟貢獻，決定提倡打工仔lunch time 9秒9跳落維港游水，徒手游出公海。此德政令大家lunch都慳番無得食，仲唔係經濟貢獻？

正當阿梁想親身試行飯後游維港這個消閒減壓活動時，突然阿☆坐洗頭艇經過，向阿梁遞上電話：

老公~

叫我梁特首！

Honey~我地喺機場比人為難~

阿梁頓時衝髮衝冠，大叫：

叫我梁~特~首！！

4. I am leung tat sau

為了替龍蝦解圍，阿梁決定出席航空公司活動緩和關係。

阿梁話大約諸葛亮那個時代，鳥兒飛過，鳥兒說：

諸葛先生你會飛嗎？

諸葛先生就代表人類在當時立志，就說：

叫我梁特首，I am leung tat sau！

阿梁一句，全場靜哂，他唯有立即補充：

這是「爛gag」！

一言驚醒夢中人，真係唔講唔知道。個爛gag 真係好笑到有時我自己都忍唔住笑，只能學白宮發言人用三隻字去形容。個三隻字係咩？梁特首囉！

阿潮都覺得自己啲gag 好爛，所以補充一句，以上故事純屬爛gag，如有雷同，實屬惡搞。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。