《太陽的後裔》之韓劇愛情公式

昨日，BB豬個工人（即係阿潮）行過超市，聽到有個賣魚佬講話有套劇《太陽的後裔》，即係韓劇。

哈哈......阿潮當堂嚇一跳，然後得啖笑。呢個世界，居然仲有戲自稱韓劇？

嗱，以阿潮被BB豬逼看韓劇的經驗，要稱得上韓劇，就一定要符合以下公式：

1. 一定有要誤會

無錯，這個誤會不止TBB《愛回家》式接近一千集誤會，而是男女主角相識必然是有誤會。

明明型英帥靚正的男主角一看就知道正直過關公，Nice 過沙皇，額頭刻住「叫我做好人」五隻字，女主角都會以為他是十惡不赦的壞人。

阿潮睇《太陽的後裔》，忍不住出聲：

宋仲基一睇就知正義過Captain America，有乜理由宋慧喬會覺得佢係古惑仔？

宋生做軍人做到咁都幾失敗下。

結果BB豬用極鄙視的眼神話：

乜你咁以貌取人嫁！呢啲叫浪漫，梗係比人屈完發覺佢個身份係好人先至夠反差有戲劇衝突啦！

無錯，只要誤會一化解，雙方感情就會極速升温，恨的反面就是愛，勁過波蘭密友長毛同曾主席又做鹿又做聖誕老人。

2. 郎才女貌是常識吧

不過阿潮以貌取人也未必有錯。古語有云：「你的樣子如何，你的日子也必如何。」

韓劇一定要有俊男美女，因為自己泡不到男神女神，才要靠追劇幻想一下。睇內涵？日日都被逼發掘啦！

「內在美」三字，只有在沒有「外在美」時才會出現。

有樣就是任性，你以為人人都可以像宋仲基趁宋慧喬講電話，一招拋手機，來一個空翻兩周同時轉體360°再一下接住，順道sell 下部手機，簡直完美滿分。

滿分位不在接手機，而是宋仲基。你試下八兩金走過來撥走你部手機：

xiao 姐，尼唔巧報警，禾系軍人......

3. 日日世界末日

根據戲劇理論，劇情一定要像過山車般有高有低才好看，所以韓劇不會只有「慘」字，一定要：

甜蜜位→悲慘位→播洗腦主題曲→再甜蜜位→再悲慘位→再播洗腦主題曲

甜蜜位充滿你每隻字都懂，但說不出口的肉麻對白，而悲慘位一定要驚天地泣鬼神，就是無懼世事變改，還是愈難愈愛。

看到男主角奮不顧身勇救女主角，BB豬又問：

如果我誤入地雷區，你會唔會救我？

阿潮腦中響起主題曲，這個一定是很悲慘很壯烈的感動位，好想說一句：

會，咁你可唔可以入地雷區先？

超強愛情線

韓劇之所以成功，在於其愛情線。明明每一套韓劇都講愛情，到底太陽的後裔如何不同？

BB豬又話：

《太陽的後裔》好唔同架，起碼無三角戀先啦！仲要第4集就有kiss 戲啦！

嘩！真係好大突破，勁過人類登火星，霍金揾到第二宇宙，創新過楊偉雄問米見Steve Jobs 喎！

所謂突破，不一定要豐功偉績，未聽過零的突破咩？

啱，所以阿潮經常覺得，只要愛情橋多（或缺乏）到連太監也溝女的TBB，開拍一套沒有愛情線的愛情劇，一定可以做神作。

▲ 相片來源：YouTube 影片截圖

結尾會是......？

今晚就是《太陽的後裔》結局，全世界都在猜宋仲基有沒有死，證明此劇已成功。

因為當大家都在關心一個角色的死活時，這個人一定很受歡迎，如每天都被全港問「你幾時死」的特事特辦先生。放心，由此可見，宋仲基跟某人一樣一定不會死。

而為了令《太陽的後裔》有真正的後裔，相信男女主角定必有Happy Ending， Forever After！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。