做「叉燒炳」都要大學畢業？

市道艱難，連燒味師傅也要大學學歷。阿潮發現網上有餐廳招聘「Siu Mei Specialist」，中文名為「燒味切割師」。廣告不但以英文撰寫，更要求應徵者有食品科學學士學位，要求之高，把Siu Mei 看成燒賣的阿潮只能望門輕嘆。

▲ (相片來源：香港討論區)

阿潮深信，此「師」就如律師、會計師等，絕非等閒之輩，一點也不易做。

早前高登巴打講笑介紹過燒味入行有9個職級，由「見習燒味助理」升至「燒味總監」甚至「燒味大師」需要40年經驗。雖然只是講笑，但足見燒味在民眾心裏不只是一門學問，更是藝術。

要成為燒味大師，除了經驗還要創意，能突破傳統框架創出「燒味壽司」、「燒肉薄餅」、「乳豬漢堡」甚至「叉燒拼烤豬肉」等方為大師傅。

再看工作範圍，要檢查食物原料品質、跟顧客保持良好關係、應付麻煩顧客......真的只有斬叉燒嗎？今次的「燒味切割師」叫得「Specialist」，要求當然專業及嚴格：

1. 大學生是常識吧！

首先你要有一個食品科學學士或以上學位。無錯！有「粵式燒味證書」也不夠，是要「食品科學學士」！ 分分鐘要First Hon 畢業！

當叉燒炳只是斬叉燒的時候，大學主修食品科學的就識得甚麼叫ISO22000衞生標準，再用Year 4 學過的「高等食品加工」為豬分析結構，再用實習時的刀法為豬分解。

其後再以Year 3 學的「食品感官評價」聽取食客意見，整個過程可被凡夫俗子概念化理解為「Chop the Char Siu」，簡稱「斬叉燒」。

2. 最重要識氹靚太

做人最緊要甚麼？父幹？美貌？後天努力？

專業的「燒味切割師」會話：通通都錯！因為工作要求中最難的便是「能跟已婚婦人建立良好溝通者優先」(Experience in communication with married women is an advantage)。

「吓？我賣燒肉啫！唔係賣肉啊！」

錯，你要的是跟她們建立良好溝通，試想一下，如果出現以下對答，應該如何回應：

已婚婦人：「你啲燒肉靚啲定我靚啲？」

燒味切割師：「靚女，你簡直係沉魚落雁、閉月羞花、貌美如豬......啊唔係，豬乸見到你都上樹啦，你竟然將自己同啲燒肉比？如果真係想比就要買斤返去慢慢比啦！」

已婚婦人：「吓？即係你啲燒肉唔靚啫！」

問你死未？以上題目難過論文答辯及哲學命題，相信連經常入熱廚房的田毛毛也無法回答。

3. 無工作經驗？做學徒啦！

其次「燒味切割師」還要有3年相關經驗，即使你畢業論文拿A++，GPA 爆到3.99都沒有用。沒有經驗，你只是一張白紙。

為了能一畢業便有工作供樓，相信不少人Year 1 時已兼職燒味助理，雖然只能裝飯洗砧板，但每天也有機會看到神聖的叉燒，有空時跟它聊天談心拉關係，也算是相關經驗。

經過四年的兼職，加上Dean List 及First Hon，今次還做不到專業的「燒味切割師」？

經歷一番沉思後，你會看到廣告底下寫道，未符合以上經驗者可考慮「Siu Mei Technician」(暫可譯為燒味技工或燒味技術員)。師傅，明白了！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。