我的分娩日記：靠笑氣捱過10級陣痛
親子
發布時間： 2018/02/05 13:07
最後更新： 2020/05/18 12:47
「我生仔嗰陣醫院連「笑氣」（止痛氣體）都無呀，幾離譜！」朋友比我早半年做媽咪，好難想像佢點樣喺無笑氣嘅情況下生B，因為講得誇張啲，我完全係靠笑氣「活過來」。
喺公立醫院生B，大致可分為3個階段︰一入院先入住產科病房；等子宮口開夠一定度數，就會轉入「待產房」；就嚟生先會推入產房。上期講到，我陣痛咗成晚，最終轉去待產房。
待產房提供更多方法比大肚婆紓緩痛楚。入院前，我仔細睇過醫院單張，知道公院有提供藥物性（如笑氣、止痛針及無痛分娩）及非藥物性（如瑜伽球、暖包等）兩類減痛方法畀產婦。不過都唔係你要求就會提供，視乎需要。以我為例，雖然曾提出想用無痛分娩，姑娘亦話幫我安排，但最終我得到嘅亦只有笑氣咋。
不過點都好，笑氣對於痛不欲生嘅我來講，有如滄海中一個珍貴嘅救生圈。當時我一攞到笑氣就係咁吸、係咁吸，雖則佢嘅止痛效果一般，我依然每隔三幾分鐘就劇痛一次，但由於吸入笑氣會令人意識迷糊，如是者，我就糊里糊塗捱過三個幾鐘。
呢段期間，我只記得兩件事︰第一係姑娘叫我唔好同陣痛鬥力。每次陣痛來襲，我都不自覺用力谷，以為有助推BB出嚟，但姑娘話咁其實會整瘀BB。另一樣我最深刻嘅就係老公不斷喺我耳邊嗌︰「老婆，加油！」就算我張床幾咁污糟、有屎又有血，佢依然喺度幫我按摩，好感動。靠住笑氣及老公嘅支持，子宮口終於開到八度，入得產房啦！
原文刊於《晴報》，標題經TOPick 編輯修改，原題為「笑氣有如救命符」
撰文 : Audrey Ng 80後P牌媽咪
