莊偉忠：甜入心的平核柿

七月底寫過篇《分甘同味的乳酪》， 當時一邊嘆法國乳酪，一邊畀咗個happy problem班同事度度，十月份應該請同事、保安、清潔女工、專櫃sales食乜東東，𠵱家揭盅，就係日本和哥山平核柿，總共五千二百粒，保證人人有份。

我哋做超市生意，請同事食嘢好應份，呢個係我哋嘅傳統，每年總要食兩三勻，唔使特別原因，總之小小心意，個個一視同仁，同事食乜，我就食乜。

八年嚟，公司已經請食過大部份日本水果，連日本蕃薯啫喱雪糕雪條雞蛋，本地燒豬燒賣蝦餃點心都食埋，多都唔記得，總之分甘同味，食乜無所謂，最緊要係有心，使少少錢，同事個個開心，超抵，抵到暈。

今次食嘅和哥山平核柿，無核啖啖肉，大裝大大粒，十二三甜度，Yummy Yummy，肯定食到甜入心。食完之後，同事唔使諗定出年食啲乜，詢眾要求，一於翻兜再食又係甜入心嘅日本蜜桃，好唔好？我諗唔使問，大家肯定舉腳贊成，一言為定。

奉勸所有管理層，唔好咁孤寒，更加唔好矯扭造作扮大方，無心扮有心，唔識尊重扮關心，明眼人一睇就識分，唔做好過做，做咗都係嘥心機捱眼瞓。

千里送鵝毛，物輕情意重，「尊重」二字值千金，係現今大部份管理層唔識嘅做人學問，同佢哋講「尊重」精神，根本係對牛彈琴。

原文刊於莊偉忠facebook，獲授權轉載。