莊偉忠：辦公室食大閘蟹

上星期，請合作夥伴食日本柿，聊表心意，今日收到回贈，你敬人一尺，人敬你一丈，點點滴滴細水長流嘅合作關係，就咁慢慢開始。

但一定要記住，禮物本身唔係最值錢，最珍貴嘅係令人感受到尊重同埋情誼，只要有心，一條毛都價值連城，收到都開心，如果畀人知道淨係靠秘書同事操心，即係無心，收到幾值錢嘅禮物，都唔會放喺心。英女皇送贈嘅莎士比亞十四行詩，配對回禮嘅CD，就係一個反面例子。

點樣令人知道自己有心，一張心意咭，親筆簽名再加兩行字慰問，又或者一通電話，一個電郵，表示銘感，禮物嘅價值即刻加分，送禮收禮雙方都咁開心。

偏偏咁簡單嘅世故人情，𠵱家好多人都唔擺喺心，禮尚往來嘅意義蕩然無存，送禮變成例行公事，根本係嘥心機捱眼瞓。

▲ 相片來源：莊偉忠facebook

呢頭第一次收到大閘蟹餽贈，同事嗰頭唔理三七廿一，夾手夾腳開爐烚咗佢嚟食，一路啜蟹膏，一路點醋汁，一路笑騎騎，見我行埋嚟，仲夠膽問我食唔食，你哋有無攪錯，咁都要問，呢度唔係「愛回家」見到腦細就散水嘅律師樓，而係正經做事、「有細無大」嘅辦公室，點可以唔預我一份。

邊個話做嘢無嚟正經，就無成績。

邊個話公司除咗做嘢，乜都唔得，連拍拖戀愛錫啖都唔得。

邊個話公司唔玩得，唔笑得，唔喊得，唔食得，唔唱得。

計我話，又玩又笑又做，至有生產力創作力，長遠至會有成績。

腦細腦細，唔識感情維繋，睬你都傻。
腦細腦細，唔玩點有精力，睬你就傻。

𠵱家最慘就係我，腦唔細，但係財少身子弱，食蟹見頭暈，聽日一於以毒攻毒，唔食多隻補身就傻。

原文刊於莊偉忠facebook。