百萬Blogger：唔輸先有機會贏

早前有幸得《iMoney》安排，與止凡兄一齊搞了個講座，其實我同止凡兄只係見過兩次面，平時都無咩溝通，只係互相都有睇下大家的文章，但當晚大家所講出的睇法竟然差不多，點知早幾日睇到一個電視節目主持人講：「數據只反映過去，投資係投資未來，所以唔好過分基於過去數據去投資。」真係英雄所見，證明無論投資股票同地產，投資思維其實都無大分別。

問後市 無意思

止凡兄當晚亦解開咗我一個謎團，原來要上封面，就一定要估市，唔怪得無乜人搵我哋做封面啦！哈哈！其實當晚最多人問的問題都係點睇後市，佢哋咁問目的係咩呢？其實根本無意思，答來都浪費我時間，講真這類人其實並非想知我睇法，只希望我睇法同佢一樣，去證明佢無做錯決定，而我亦相信佢哋見到邊個都係咁問，只要有人答法同佢諗法一樣，佢就滿意啦！

但如果唔係咁問我重驚，即係「冧巴黨」，最緊要你講佢知咩冧巴會升就得！好似嗰晚我話唔投資會死的人，就去投機工廈啦！即刻有人會問應該買邊區？我話你知邊區的話，其實即係老點你，嗰區呎價做緊1,800元，你去買2,500元點算？唔通真係等願景咩？咪傻啦！願景係要嚟Sell客㗎咋！

未計贏 先計輸

你有無聽過有投資者話會睇願景？當然有啦！不過在話你聽之前，已經入晒貨再引你去接貨啫！哈哈！所以我可以話你知，呢一類人投資真係好危險，賺到錢都真係好好彩，明顯唔會做功課，起碼來聽我講座前都無去了解過我係咩人，簡直係浪費時間同金錢，所以難怪呢幾年最好的投資，就係開班授課，因為只要你肯開，一定有人來報名，好過走去買樓買股票啦！

其中一個當晚止凡只所講的重點，就係投資好多時都係講感覺，我講唔到俾你聽點解我會覺得呢個單位抵買，但我就係知買咗一定賺錢，呢個就係我做唔到分析員同「估市員」的原因，因為我無一大堆數據去支持我和解釋我的諗法同做法，而我只有一條方程式去計算我投資將會遇到的風險，都係嗰句啦：

未計贏先計輸！通常死得最慘的，都係只諗會賺幾多而無諗會輸幾多的人！總之緊記，輸錢皆因贏錢起，只要唔輸先有機會贏。

全文刊於《iMoney智富雜誌》第436期（收費閲讀）

iMoney智富雜誌facebook